ABŞ prezidenti Donald Tramp Yaponiya ilə böyük ticarət razılaşması elan edib və bunun milyardlarla investisiya gətirəcəyini və Amerika sənayelərini gücləndirəcəyini iddia edib.
Bu barədə D.Tramp "Truth Social" sosial platformasında yazıb.
"Yaponiya ilə böyük bir saziş bağladıq. Yaponiya mənim göstərişimlə ABŞ-a 550 milyard dollar investisiya qoyacaq, ABŞ-a bundan 90% mənfəət çatacaq", - Tramp bildirib.
Yaponiyanın Baş naziri Şigeru İşiba isə Trampın elan etdiyi ticarət razılaşmasının təfərrüatlarını araşdırmadan şərh verməyəcəyini bildirib.
İşiba Tokioda jurnalistlərə "Danışıqların nəticəsi barədə nə düşünməliyik, bu barədə yalnız danışıqların və razılaşmanın təfərrüatlarını diqqətlə araşdırdıqdan sonra müzakirə haqqında düşüncəmi ifadə edə bilərəm" deyib.
Prezident əlavə edib ki, ABŞ Yaponiyaya avtomobil, düyü və digər kənd təsərrüfatı məhsullarını tədarük etməyə başlayacaq.
Trampın bu açıqlaması Vaşinqton və Tokio arasında xüsusilə avtomobil tarifləri və milli təhlükəsizliklə bağlı vergilər üzərində aylarla davam edən gərgin danışıqlar fonunda gəlib.
Tramp əvvəllər Yaponiyadan idxal olunan avtomobillərə 25 faiz, polad və alüminiuma isə 50 faiz tarif tətbiq etməklə hədələsə də, iyulun 22-də etdiyi paylaşımda sənaye sahəsində müəyyən iş sahələrinə aid olan tariflərin razılaşmanın bir hissəsi olaraq ləğv ediləcəyinə aydınlıq gətirməyib.
Trampın qeyd etdiyi 15 faiz tarif rəqəmi əvvəlki təhdidlərdən aşağı olsa da, əvvəlki ticarət çərçivələrində görülən tariflərdən xeyli yüksəkdir.
Ağ Ev şərh tələblərinə cavab verməyib, yapon rəsmilər də hələ rəsmi açıqlama yaymayıblar.
