Çin, Rusiya və İran diplomatlarının görüşdüyü bildirilir. Rəsmi Pekin, bu danışıqların Tehranın nüvə proqramı ilə bağlı uzun müddət dayandırılmış danışıqları yenidən başlatmaq üçün bir fürsət olacağına ümid edir.
Rəsmi Tehran Vaşinqtonun sazişdən çıxmasından sonra 2015-ci il əldə olunan razılaşmanın müddəalarına bir il ərzində riayət etdi, lakin daha sonra öz öhdəliklərini geri çəkməyə başladı. Razılaşmanın bərpası üçün göstərilən səylər isə uğursuz oldu.
Rəsmi Pekin cümə günü keçirilən danışıqların ünsiyyət və koordinasiyanı gücləndirəcəyinə, dialoq və danışıqların erkən bir vaxtda bərpasına zəmin yaradacağına ümid etdiyini bildirib.
Çinin CCTV telekanalının görüşlə bağlı yaydığı məlumatda üç diplomatın İranın nüvə məsələsi və digər ümumi maraq doğuran məsələlər barədə fikir mübadiləsi apardığı bildirilib.
Dövlət mediası, Çinin Xarici İşlər nazirinin müavini Ma Zaoxu, Rusiyanın Xarici İşlər nazirinin müavini Sergey Ryabkov və İranın Xarici İşlər nazirinin müavini Kazem Qaribabadinin iştirak etdiyi görüşlə bağlı daha ətraflı məlumat verməyib.
2025-ci ilin yanvarında vəzifəyə başlayan Donald Tramp İran əleyhinə maksimum təzyiq siyasətini yenidən tətbiq edib. Bu addım, onun ilk prezidentliyi dövründəki yanaşmasını əks etdirir.
O, İranla yeni danışıqlar aparmağa çağırıb, lakin Tehran ABŞ sanksiyaları qüvvədə olduğu müddətdə birbaşa danışıqları rədd edib.
Bərabər şərtlər
Donald Tramp bu həftə Tehrana nüvə danışıqlarına çağıran bir məktub göndərib və əgər İran imtina edərsə, mümkün hərbi tədbirlər barədə xəbərdarlıq edib.
Rəsmi Tehran cümə axşamı yaydığı bəyanatda, Trampın İranın dini lideri Ayətullah Əli Xameneiyə ünvanladığını bildirdiyi məktubun hazırda nəzərdən keçirildiyini açıqlayıb.
“ABŞ sanksiyaları ləğv etməlidir,” - deyə İranın xarici işlər naziri Abbas Eraqçi cümə axşamı hökumətin rəsmi qəzetinə verdiyi müsahibədə bildirib.
“Biz bərabər şərtlər əsasında, təzyiq və təhdidlərdən azad olduğumuz zaman və xalqın milli maraqlarının təmin olunacağına əmin olduğumuz halda birbaşa danışıqlara başlayacağıq,” - deyə o əlavə edib.
Beynəlxalq Atom Enerjisi Agentliyinin (IAEA) keçən ay yayımladığı hesabatda, İranın zənginləşdirilmiş uran ehtiyatını 60 faiz təmizlik səviyyəsinə çatdırdığı qeyd edilib.
İranın dini lideri Ayətullah Xamenei bu həftə bildirib ki, ölkəsi nüvə silahına malik deyil və onu əldə etməyə çalışmır.
BMT-nin Beynəlxalq Atom Enerjisi Agentliyinin (IAEA) fevral ayında yayımladığı hesabatda da İranın zənginləşdirilmiş uran ehtiyatını 60 faiz təmizlik səviyyəsinə çatdırdığı qeyd olunmuşdu.
