Türkiyə Respublikasının Daxili İşlər Naziri Mustafa Çiftçi Türkiyə-Belçika Xarici İşlər, Ədliyyə və Daxili İşlər nazirlərinin 4-cü görüşü çərçivəsində səfərdə olduğu Belçikanın paytaxtı Brüsseldəki təmaslarını qiymətləndirib.
Belçika ilə köklü diplomatik əlaqələrin 188-ci ilində iki ölkənin Xarici İşlər, Ədliyyə və Daxili İşlər nazirlərini bir araya gətirən iclasın dördüncüsünü Brüsseldəki "Eqmont" sarayında keçirdiklərini bildirən M.Çiftçi bu formatdakı son görüşün 2016-cı ildə Ankarada təşkil olunduğunu xatırladıb.
M.Çiftçi aradan keçən 10 ildən sonra 7 nazirin yenidən bir araya gəlməsinin özlüyündə mühüm bir iradənin göstəricisi olduğunu vurğulayıb.
Mustafa Çiftçi Xarici İşlər Naziri Hakan Fidan və Ədliyyə Naziri Akın Gürlek ilə birlikdə belçikalı həmkarları Bernard Kintin, Annelis Verlinden, Maksim Prevo və Annelin Van Bossuyt ilə Türkiyənin təhlükəsizliyini və vətəndaşların əmin-amanlığını birbaşa maraqlandıran mövzuları müzakirə etdiklərini bildirib.
Brüsseldə yaşayan, çalışan və bu ölkənin iqtisadiyyatına töhfə verən təxminən 300 min Türkiyə vətəndaşının iki ölkə arasındakı ən güclü əlaqə vasitəsi olduğuna diqqət çəkən M.Çiftçi: "Lakin həqiqi dostluq yaxşı gündə yan-yana durmaqla yanaşı, dincliyimizi hədəf alan cinayətkarlara qarşı birlikdə mübarizə aparmağı da tələb edir", – deyə qeyd edib.
Nazir M.Çiftçi Prezident Rəcəb Tayyib Ərdoğanın ortaya qoyduğu baxış bucağı istiqamətində Türkiyənin xarici siyasətdə həm masa arxasında, həm də meydanda sözü dinlənilən bir ölkə mövqeyinə gəldiyini vurğulayıb. O, fikirlərinə belə davam edib: "Xaricdəki bu qətiyyət daxildə də güclü bir cəbhə qurmağı məcbur etdi. Onilliklərimizi hədər edən terrordan millətçə azad olmaq ərəfəsindəyik. Terrorsuz Türkiyə hədəfimizə addım-addım yaxınlaşırıq. Əmin-amanlığın kök saldığı bu mühitdə isə yeni bir təhlükə meydana çıxdı. Bu, mütəşəkkil cinayətkarlıq və onun yeni nəsil qollarıdır. Təkcə 2026-cı ildə Təhlükəsizlik, Jandarma və Sahil Mühafizəsi təşkilatlarımızın keçirdiyi 1.741 əməliyyatda 22-si beynəlxalq səviyyədə olmaqla, ümumilikdə 625 mütəşəkkil cinayət dəstəsi çökdürüldü. Qaçaqmalçılıq və Mütəşəkkil Cinayətkarlıqla Mübarizə, Narkotik və Kiber cinayətlər bölmələrimiz bu mübarizəni həm küçədə, həm də rəqəmsal dünyada fasiləsiz sürdürür. Hər növ qanunsuz birləşmənin qarşısında durmaqda qərarlıyıq".
Təhlükəsizlik, jandarma və sahil mühafizə orqanları ilə bu millətin dincliyini heç kimə tapdalatmayacaqlarını vurğulayan M.Çiftçi dövlətin əlinin vətəndaşına yönələn təhlükəni dünyanın o biri başında da zərərsizləşdirəcək qədər uzun olduğunu vurğulayıb.
Cinayətkarlar Türkiyəyə təhvil verilməlidir
Nazir M.Çiftçi yeni nəsil cinayətkar təşkilatların böyük bir hissəsinin fəaliyyətlərini xarici əlaqələri üzərindən həyata keçirdiyini bildirərək bunları qeyd edib:
"Aralarında Belçikanın da olduğu ölkələrdə vətəndaşlarımızı hədələyir, onların iş yerlərinə və evlərinə hücum edirlər. Bunun ən konkret və qəbuledilməz nümunəsi Brüsseldə “Hanımeli” şirniyyat evinin sahibi cənab Oğuz Arkayadır. O, 2026-cı ilin iyun ayında “Daltonlar” adlı dəstə tərəfindən əvvəlcə hədələnib, daha sonra evinə bombalı hücum təşkil olunub. Bu hədsiz hədələrin Baş konsulluğumuzda çalışan bir diplomatımızın yaxınlarına qədər çatması məsələnin ciddiliyini açıq şəkildə ortaya qoyur. Bir vətəndaşımızın qapısına qoyulan bomba dövlətimizin qapısına qoyulmuş sayılır. Hazırda bu cinayət şəbəkələrinin rəhbəri və ya üzvü olan, bizim üçün xüsusi əhəmiyyət kəsb edən 5 şəxsin Belçikada olduğunu ehtimal edirik. İnterpol qurumlarımız və hüquq-mühafizə kanallarımız vasitəsilə, Ədliyyə Nazirliyimizlə əlaqəli şəkildə bu şəxslərin ölkəmizə təhvil verilməsini tələb edirik".
2027–2028-ci illər üzrə Ortaq Fəaliyyət Planı
Nazir M.Çiftçi bu qətiyyətin ən konkret göstəricisinin bugün Türkiyə Polis Təşkilatı ilə Belçika Federal Polisi arasında imzalanan "2027–2028-ci illər üzrə Ortaq Fəaliyyət Planı" olduğunu ifadə edib. Nazir deyib: "Bu plan ilə terrorizm, mütəşəkkil cinayətkarlıq, narkotik və silah qaçaqmalçılığı, qanunsuz miqrasiya və insan alveri başda olmaqla, transmilli cinayətlərlə mübarizədə əməkdaşlığımızı gücləndirəcəyik. Qarşılıqlı ekspert görüşləri və ortaq təlim fəaliyyətləri ilə bilgi və təcrübə mübadiləsini artıracaq, iki ölkənin təhlükəsizlik qurumları arasındakı peşəkar təmasları daha irəliyə aparacağıq".
Çiftçi Ortaq Fəaliyyət Planının sadəcə bir protokol adı olmadığını, iki dövlətin cinayətkarlığa qarşı verdiyi ortaq sözün adı olduğunu bildirib: "Bugünkü görüşlərdə həmkarlarımın ortaya qoyduğu iradə də ümidvericidir. Dəyərli həmkarım cənab Bernard Kintenin ifadə etdiyi kimi, cinayət şəbəkələri getdikcə daha çox beynəlxalq xarakter alır. Bu da polis təşkilatlarımız arasındakı koordinasiyanı daha sürətli məlumat mübadiləsi, ekspertiza dəyişdirilməsi və ortaq təlimlərlə gücləndirməyi məcbur edir. Ədliyyə sahəsində isə xanım Annelis Verlindenin vurğuladığı kimi, mütəşəkkil cinayətkarlıq sərhəd tanımır".
44 ölkədən 714 şəxs ölkəyə gətirildi
Cinayət şəbəkəsi sərhəd tanımırsa, təşkilatlar arasındakı əməkdaşlığın da sərhədsiz olacağına diqqət çəkən M.Çiftçi qiymətləndirməsini belə davam etdirib:
"Bugünkü mesajımızı daha geniş bir çərçivəyə oturtmaq istərdim. Xaricə qaçaraq dövlətin əlindən qurtulacağını zənn edənlərə qarşı apardığımız təhlükəsizlik diplomatiyasını ictimaiyyətimiz yüksək qiymətləndirir. Bolqarıstandan Gürcüstana, Yunanıstandan bu gün Brüsselə qədər atdığımız hər addım bu qərarlı duruşun göstəricisidir. Təkcə bu il 44 ölkədən 714 şəxsi, aralarında 170 mütəşəkkil cinayət dəstəsi rəhbəri və üzvü olmaqla, hüquq-mühafizə orqanlarımızın qətiyyətli təqibi ilə ölkəmizə gətirdik. Hazırda 969 nəfər haqqında qırmızı bülleten çıxarılıb. Cinayətkar sərhədi keçdiyini zənn edir, halbu ki, aşdığı hər sərhəd onun üçün yeni bir tələnin qapısıdır. Dövlətimiz heç bir cinayətkarı unutmaz. Vaxtı və saatı gələndə cinayətkarın cəzasını verər".
Nazir M.Çiftçi cinayətkar təşkilatlar üçün dünyanın heç bir yerinin "təhlükəsiz liman" olmadığını vurğulayaraq, cinayət törədib sərhədin o tərəfinə qaçmağın xilas yolu olmadığını, sadəcə tutulmağını biraz təxirə saldığını bildirib.
"Terror bu gün bir ölkənin dərdi, sabah hər kəsin kabusudur"
Mübarizələrinin yalnız mütəşəkkil cinayətkarlıqla məhdudlaşmadığına diqqət çəkən M.Çiftçi deyib: "Belçikada PKK, DHKP-C, MLKP, TKP-ML və FETÖ kimi terror təşkilatı üzvlərinin varlıq göstərməsi, hətta bu ölkəni bir baza kimi istifadə etməsi müttəfiqlik ruhuna uyğun deyil. Terror bu gün bir ölkənin dərdi, sabah hər kəsin kabusudur. Belə ki, PKK, DHKP-C və MLKP kimi terror təşkilatları Belçikada silahlı aksiya keçirməsələr də, maliyyə təminatı, militan toplama və təbliğat fəaliyyətlərini davam etdirirlər. Xüsusilə terror təşkilatı PKK-nın özünü buraxmasına icazə verilməməsi, keçmişdə yaşanan “Ariadna” qərarı bənzəri halların təkrar olunmaması bizim üçün böyük əhəmiyyət kəsb edir. Terrorun bitdiyini bəyan etmək başqa şeydir, terror şəbəkələrinin tamamilə dağıldığından əmin olmaq başqa şeydir".
"Bu quruluş Belçikanı bir sığınacaq kimi istifadə edir"
M.Çiftçi FETÖ-nün 15 İyul 2016-cı ildə millətə qarşı xain bir dövlət çevrilişinə cəhd etdiyini xatırladaraq deyib: "Bu quruluş bu gün Belçikanı adəta bir sığınacaq kimi istifadə edir. FEDACTIO adı altındakı müxtəlif dərnəklər və təhsil müəssisələri vasitəsilə fəaliyyətlərini davam etdirirlər. Bu məktəb və qeyri-hökumət təşkilatlarının yaxından izləniləcəyi təqdirdə dələduzluq, rüşvətxorluq, tenderlərdə saxtakarlıq və çirkli pulyuma kimi bir çox cinayətin üzə çıxacağına inanırıq. Nazirliyimizin terrora görə axtarılanlar siyahısında yer alan 33 FETÖ mensubunun Belçikada olduğunu ehtimal edirik. Bu şəxslərin saxta məlumat və sənədlərlə sığınacaq sistemini istismar etməsinin qarşısının alınmasını gözləyirik. Bu məsələ bu gün həmkarıma çatdırılıb və lazımi addımların atılması tələb olunub".
"Dini istismar edən DEAŞ terror təşkilatına qarşı da meydanda üz-üzə mübarizə aparan yeganə NATO ölkəsiyik", – deyə bəyan edən M.Çiftçi "Xarici Terrorçu Döyüşçülərin" gəldikləri ölkələrə geri göndərilməsinin bu təşkilatın bölgədə yenidən mövqe qazanmaması baxımından böyük əhəmiyyət kəsb etdiyinə diqqət çəkib. M.Çiftçi bu məsələdə həmsöhbətlərinə hər cür dəstəyi verməyə hazır olduqlarını da çatdırıb.
"Belçikaya göndərdiyimiz təhvil sorğularından bu günə qədər heç biri qəbul edilməyib"
İfrat sol terrorun Belçikadakı vəziyyətinin də qarşılarında olduğunu bildirən M.Çiftçi deyib: "DHKP-C ilə əlaqəli “Grup Yorum” adlı qruplaşmanın 19 dekabr 2026-cı ildə Lyejdə bir konsert təşkil edəcəyi müəyyən olunub. Fehriye Erdal işi üzrə dövlət təqibinin heç vaxt ləğv olunmayacağını xatırlatmaq da istərdim. 2016-cı ildən 2026-cı ilə qədər olan on ildə terror cinayətləri çərçivəsində Belçikaya göndərdiyimiz təhvil sorğularından bu günə qədər heç biri qəbul edilməyib. Əsasən terror təşkilatı PKK və FETÖ mensublarına aid bu tələblər ya rədd edilir, ya da cavabsız saxlanılır. Bu mənzərə terror təşkilatı üzvlərinin özlərini Belçikada təhlükəsizlikdə hiss etmələrinə şərait yaradır. Terror mənsublarının qaçqın statusunu istismar etməsinin qarşısının alınması həm təhlükəsizliyimizin, həm də vicdanımızın ortaq tələbidir. Aradan vaxt keçsə də, dövlətin təqibi heç vaxt dayanmayacaq".
"Bu gözəl ölkə terrora yox, dostluğa qapı açmalıdır"
M.Çiftçi onlar üçün təhlükəsizliyin cinayət törədildikdən sonra deyil, törədilmədən əvvəl başladığını vurğulayıb: "Bu çərçivədə cənab Maksim Prevonun bu gün dilə gətirdiyi “Türkiyə ilə əlaqə qurmadan Avropa təhlükəsizliyi ciddi şəkildə müzakirə oluna bilməz” sözlərini iki ölkənin ortaq yönünün ifadəsi kimi yüksək qiymətləndirirəm".
Türkiyənin beynəlxalq hüquqa və NATO müttəfiqliyi ruhuna uyğun olaraq hər növ əməkdaşlığı qətiyyətlə davam etdirəcəyini vurğulayan M.Çiftçi deyib: "Eyni qətiyyəti dost və müttəfiq ölkələrdən də gözləyirik. Çünki həqiqi müttəfiqlik eyni masada oturmaq qədər, eyni təhlükəyə qarşı eyni cəbhədə dura bilməkdir. Arzumuz açıq və səmimidir: Avropanın qəlbində döyünən bu gözəl ölkə terrora yox, dostluğa qapı açmalıdır. Müttəfiqin torpağı terrorçunun sığınacağı ola bilməz.
Beynəlxalq əməkdaşlığımızı gücləndirərək ortaq təhlükəsizlik hədəflərimiz istiqamətində çalışmağı, vətəndaşlarımızın əmin-amanlığını və təhlükəsizliyini qorumağı qətiyyətlə davam etdirəcəyik. Bu düşüncələrlə belçikalı həmkarlarıma qonaqpərvərliklərinə görə təşəkkür edir, bugünkü təmaslarımızın iki ölkə və iki dost xalq üçün xeyirli olmasını arzulayıram".
