Çin Böyük Britaniyanın Rusiyanın enerji sektorunu dəstəkləyən və Moskvanın müdafiə sektoruna kritik avadanlıqlar tədarük edən 11 Çin şirkətinə sanksiya tətbiq etməsindən sonra sərt bəyanatlarla çıxış edib.

Çinin Böyük Britaniyadakı səfirliyinin sözçüsü bildirib ki, Çin bu sanksiyalara qəti şəkildə etiraz edir və rəsmi Londonu dərhal onları ləğv etməyə çağırdı.

Böyük Britaniya oktyabrın 15-də Ukraynadakı müharibə ilə bağlı Kremlə təzyiqi artırmaq məqsədilə Rusiya və Çin şirkətlərinə qarşı sanksiyalar tətbiq etməyə başlayıb.

Böyük Britaniyanın Maliyyə Nazirliyinin rəsmisi Raşel Reves qeyd edib ki, hökumət Rusiya neftinin qlobal bazarlara axınını asanlaşdıran Hindistan və Çin şirkətlərinə qarşı “məqsədli” tədbirlər həyata keçirir.

Rəsmi Pekin isə Böyük Britaniyanın sanksiyalarını beynəlxalq hüquqa əsaslanmayan birtərəfli tədbirlər kimi qiymətləndirib.

Səfirliyin sözçüsü vurğulayıb ki, bu sanksiyalar Çin şirkətlərinin qanuni hüquq və maraqlarına ciddi zərər vurur.

“Ukrayna böhranı zamanı Çin obyektiv və qərəzsiz mövqe nümayiş etdirib, sülh danışıqlarını təşviq edib, ikili təyinatlı malların ixracına isə qanun və qaydalara uyğun ciddi nəzarət edib’’,-deyə səfirliyin sözçüsü qeyd edib.

Səfirlik həmçinin rəsmi Pekinin ittiham və qarayaxma cəhdlərini qəti şəkildə rədd etdiyini bəyan edib.

Sözçü həmçinin deyib: “Biz Böyük Britaniyanı səhvini dərhal düzəltməyə və Çinin müvafiq qurumlarına qarşı tətbiq edilən sanksiyaları ləğv etməyə çağırırıq. Çinin maraqlarına zərər verən hər hansı bir addıma qətiyyətlə cavab veriləcək’’.