"Yonhap" xəbər agentliyinin məlumatına görə, Cənubi Koreya beynəlxalq ictimaiyyəti Şimali Koreyanın nüvə proqramına qarşı qətiyyətli tədbirlər görməyə çağırıb. Cənubi Koreya rəsmiləri rəsmi Pxenyanın fəaliyyətini qlobal nüvə silahlarının yayılmaması sisteminə ən ciddi təhdid kimi qiymətləndiriblər.

Nyu-Yorkda keçirilən Nüvə Silahlarının Yayılmaması Müqaviləsi (NPT) üzrə konfransda çıxış edən Cənubi Koreya xarici işlər nazirinin müavini Çonq Yeonq Du Şimali Koreyanın nüvə silahı hazırlamaq cəhdlərinin ciddi problem yaratdığını vurğulayıb. Nazir müavini bildirib ki, Şimali Koreya bu müqavilənin verdiyi üstünlüklərdən istifadə etdikdən sonra ondan çıxdığını deyən və nüvə proqramını açıq şəkildə davam etdirən yeganə ölkədir.

Çonq Yeonq Du beynəlxalq ictimaiyyəti Pxenyana qarşı birgə addım atmağa və vahid mövqe nümayiş etdirməyə çağırıb. O bildirib ki, Şimali Koreyanın təhlükəsizliyi və iqtisadi gələcəyi yalnız onun beynəlxalq müqavilə şərtlərinə qayıtmasından asılıdır.

Rusiya məsələsinə də toxunan nazir müavini Moskvanı Pxenyanla hərbi əməkdaşlığı dayandırmağa çağırıb. O, bu cür əməkdaşlığın BMT Təhlükəsizlik Şurasının qətnamələrini kobud şəkildə pozduğunu və qlobal təhlükəsizlik rejiminə zərbə vurduğunu deyib.

Qeyd edək ki, 1970-ci ildə qüvvəyə minmiş NPT nüvə silahlarının yayılmasının qarşısını almaq və dinc məqsədli nüvə enerjisindən istifadəni təşviq etmək məqsədi daşıyan əsas qlobal sənəddir. Müqavilənin icrasını qiymətləndirmək üçün hər beş ildən bir beynəlxalq konfrans keçirilir.