Oktyabrın 27-də Litvanın Baş naziri İnqa Ruqinene ölkənin Belarusla sərhədini qeyri-müəyyən müddətə bağlamaq və hava məkanını pozan şarları vurmaq planlarını açıqlayıb.

Vilnüs Hava Limanında son günlərdə müşahidə olunan şarların uçuşlara mane olması səbəbindən hava limanının fəaliyyəti dayandırılıb. Məlumata görə, İnqa Ruqinene bu səbəbdən Milli Təhlükəsizlik Komissiyasının təcili iclasını çağırıb. İclasda hökumətin gələcək addımlarını müəyyən edən “aydın alqoritm” təqdim olunub.

LRT nəşrinin məlumatına görə, İnqa Ruqinene hökumətin müəyyən istisnalar olmaqla Belarusla sərhədi qeyri-müəyyən müddətə bağlamaq qərarı üzərində işlədiyini təsdiqləyib.

“Diplomatlar və diplomatik poçtların hərəkətinə icazə veriləcək. Aİ vətəndaşları da Belarusdan ölkəmizə daxil ola biləcəklər. Lakin bütün digər keçidlər bağlanacaq. Beləliklə, Belarusa burada heç bir hibrid hücumun baş verməsinə imkan verilməyəcəyini və bu cür hücumların qarşısını almaq üçün ən sərt tədbirlərin görüləcəyini bildiririk”, – deyə Baş nazir vurğulayıb.

O, həmçinin bildirib ki, hərbçilər hava məkanına daxil olan şarları zərərsizləşdirmək üçün kinetik vasitələrdən istifadə etməklə bütün zəruri tədbirləri görəcəklər.

İ.Ruqinene deyib: ‘‘Müttəfiqlərimiz və qonşularımız – Polşa və Latviya ilə fəal şəkildə məsləhətləşmələr aparırıq. Atdığımız hər addımı onlarla əlaqələndiririk. Biz tək dövlət deyilik – NATO və Aİ-nin bir hissəsiyik”.

Litvanın Böhran İdarəetmə Xidməti məlumat verib ki, yerli vaxtla saat 22:10-dan etibarən Belarusdan Litvaya doğru uçan şarların aşkarlanması səbəbindən Medininkai və Salçininkai sərhəd keçid məntəqələrində nəqliyyat vasitələrinin və insanların hərəkəti müvəqqəti dayandırılıb.

Vilnüs Hava Limanı da rəsmi ‘‘Facebook’’ səhifəsində Belarus istiqamətindən gələn şarların hava limanına yaxınlaşması səbəbindən hava nəqliyyatının müvəqqəti olaraq dayandırıldığını açıqlayıb.