Hadisə şahidinin lentə aldığı video-görüntüdə 28 yaşlı venesuelalı miqrant Vilber Rafael Qarses Peres əks olunur. O, sentyabrın 20-də Texasın Ostin şəhərində ABŞ İmmiqrasiya və Gömrük Mühafizəsi Xidməti (ICE) əməkdaşının atəş açması nəticəsində avtomobilinin içində yaralanıb. Qarses Peres xəstəxanaya çatdırılıb. Lakin vəkilinin bildirdiyinə görə, müvəkkili vurulduqdan dörd saat sonra güllə hələ də bədənində olduğu halda xəstəxanadan çıxarılıb. Daha sonra o, dindirilmək üçün Pirsol şəhərində yerləşən Cənubi Texas ICE deportasiya və saxlanma mərkəzinə köçürülüb. Vəkil həmçinin iddia edir ki, müvəkkilinə ağrıkəsici verilməyib və o, döşəmədə uzanmaq məcburiyyətində qalıb.

ABŞ Daxili Təhlükəsizlik Nazirliyi (DHS) verdiyi bəyanatda Qarses Peresin ABŞ-yə “qanunsuz daxil olmuş” “qanunsuz əcnəbi” olduğunu bildirib. Lakin vəkili müvəkkilinin “sığınacaq müraciəti etmək üçün sınaq proqramı çərçivəsində ölkəyə qanuni şəkildə daxil olduğunu və etibarlı iş icazəsinə sahib olduğunu” açıqlayıb.