İranda etirazlar başlayandan bəri ölənlərin sayı 2 570-i keçib

Mərkəzi qərargahı ABŞ-da yerləşən və İran yönümlü insan haqları təşkilatının (HRANA) yaydığı açıqlamaya görə, İranda keçirilən etirazlarda həyatını itirənlərin sayı 2 571-ə yüksəlib. Ölkə rəhbərliyi isə son illərdə qarşılaşdığı ən böyük müxalifət dalğası ilə üz-üzədir.

HRANA 2 403 etirazçının, hökumət qüvvələri ilə əlaqəli 147 nəfərin, 12 uşağın və etirazlarda iştirak etməyən doqquz mülki şəxsin ölümünün təsdiqləndiyini bildirib.

İran rəsmilərindən biri yanvarın 13-də təxminən 2 000 nəfərin həyatını itirdiyini qəbul edib. Bu, iki həftədən artıq müddət əvvəl başlayan ölkə miqyaslı iğtişaşlardan bəri səlahiyyətlilərin açıqladığı ilk ümumi rəqəm olub.

Pisləşən iqtisadi şərait səbəbindən keçirilən etirazlar son üç ildə İran rəhbərliyinin üzləşdiyi ən ciddi ölkədaxili çətinliyə çevrilib.

Etirazlar ötən il İsrail və ABŞ hücumlarından sonra artan beynəlxalq təzyiqlər fonunda baş verib.

Hərbi əməliyyat gündəmdə

ABŞ prezidenti Donald Tramp yanvarın 13-də iranlıları etirazları davam etdirməyə çağıraraq “yardım yoldadır” paylaşımını edib.

Dediklərinin nə demək olduğu soruşulduqda Tramp jurnalistlərə “bunu onların özləri həll etməli olacaqlar” cavabını verib və hərbi əməliyyatın təzyiqə cavab kimi nəzərdən keçirilən variantlar arasında olduğunu deyib.

İranlı rəsmilər isə ABŞ və İsraili iğtişaşları qızışdırmaqda ittiham edərək, baş verən ölümləri xaricdən istiqamətləndirilən “terrorçu ünsürlərlə” əlaqələndiriblər.