Donald Tramp İsrailə səfər etməyə hazırlaşır

ABŞ prezidenti Donald Tramp yaxın günlərdə İsrailə səfər etməyə hazırlaşır. Onun Knesetdə çıxış edəcəyi gözlənilir.
Səfərin İsrail və Fələstinin müqavimət hərəkatı ‘‘Həmas’’ arasında əldə olunmuş atəşkəs razılaşmasından dərhal sonra baş tutacağı bildirilir.

"Axios" nəşrinə müsahibə verən Donald Tramp bildirib ki, İsrail liderləri onu parlamentdə çıxış etməyə dəvət ediblər.

Donald Tramp Benyamin Netanyahu ilə telefon danışığından sonra bunları deyib:
“Bu, İsrail və dünya üçün əla gündür. ‘Bibi’ ilə görüşüm gözəl keçdi. O, çox xoşbəxtdir – və elə də olmalıdır. Bu, böyük nailiyyətdir. Bütün dünya, o cümlədən düşmən ölkələr belə, bu razılaşmaya nail olmaq üçün bir araya gəldi’’.

ABŞ prezidenti həmçinin bildirib ki, ‘‘Həmas’’ və İsrail arasında əldə olunan razılaşmadan sonra İranın da daha geniş sülh planının bir hissəsinə çevriləcəyinə inanır.

Qeyd edək ki, Donald Tramp oktyabrın 8-də İsrail və ‘‘Həmas’’ın ABŞ-ın Qəzza ilə bağlı atəşkəs planının birinci mərhələsini qəbul etdiyini açıqlayıb.
“Bütün əsirlər tezliklə azad ediləcək və İsrail öz qoşunlarını razılaşdırılmış xəttə çəkəcək. Bu, güclü, davamlı və əbədi sülhə doğru ilk addımdır,” – deyə Donald Tramp bildirib. O, bütün tərəflərə "ədalətli" münasibət göstəriləcəyini vurğulayıb.

ABŞ prezidenti həmçinin jurnalistlərə açıqlamasında bu həftənin sonunda Misirə səfər edə biləcəyini də deyib. Ağ Ev isə Trampın regional səfərinin nəzərdən keçirildiyini təsdiqləyib.

Donald Tramp bu bəyanatı İsrailin Qəzzaya qarşı hücumlarının ikinci ildönümündən bir gün sonra verib.
Son iki ildə İsrailin həyata keçirdiyi əməliyyatlar nəticəsində əksəriyyəti qadın və uşaq olmaqla 67 min 100-dən çox fələstinli həyatını itirib. Mütəxəssislər bu rəqəmin daha çox ola biləcəyini bildirirlər.

İsrail ərazinin böyük hissəsini viran qoyub və demək olar ki, bütün əhalini köçkün vəziyyətinə salıb.