SANA xəbər agentliyinin məlumatına görə, Suriya prezidenti Əhməd Şəraa rəsmi danışıqlar aparmaq üçün ABŞ-a səfər edib.

Agentlik bildirib ki, Ə.Şəraa 6 noyabrda Braziliyada keçirilən COP30 İqlim Sammitinə qatıldıqdan sonra noyabrın 8-də ABŞ-a yola düşüb.

Suriya prezidentinin 10 noyabrda Ağ Evdə ABŞ Prezidenti Donald Tramp ilə görüşəcəyi gözlənilir.

Qeyd edək ki, Suriya prezidentinin bu səfəri Vaşinqton hökumətinin Ə.Şəraanı terror siyahısından çıxarmasının ardınca baş verib.

ABŞ Dövlət Departamentinin sözçüsü Tommi Piqot bildirib ki, Ə.Şəraa administrasiyası itkin düşmüş amerikalıların tapılması və qalan hər hansı kimyəvi silahın tamamilə məhv edilməsi də daxil olmaqla ABŞ-ın tələblərini yerinə yetirib. T.Piqot deyib:

“Bu addımlar Bəşər Əsədin hakimiyyətdən getməsinin və Əsəd rejimi altında 50 ildən artıq davam etmiş repressiyalardan sonra Suriya rəhbərliyinin göstərdiyi irəliləyişin tanınması kimi atılır.”