İsrail mediasının məlumatına görə, İsrail İrana qarşı mümkün ABŞ hücumu xəbərləri fonunda Hava Qüvvələri və ordu bölmələri üçün həyəcan səviyyəsini yüksəldib.
“Maariv” qəzeti israilli hərbi mənbələrə istinadən yazıb ki, həyəcan səviyyəsi Hərbi Hava Qüvvələrində, Hərbi Kəşfiyyat Xidmətində və Şimal Komandanlığında artırılıb.
Məlumata görə, daxili cəbhədə hazırlıq səviyyəsinin dəyişdirilməsi ilə bağlı qərar qəbul edilməyib.
Qəzet qeyd edib ki, ordu ABŞ ordusunun Tehrana hücum başlada biləcəyi ilə bağlı narahatlıqlar fonunda İrandakı prosesləri yaxından izləməyə davam edir.
Qəzetin məlumatına görə, İsrail ordusu İrana qarşı mümkün hər hansı hücumla bağlı ABŞ-ın Mərkəzi Komandanlığı (CENTCOM) ilə koordinasiya aparır.
Bu xəbərlər ötən ayın sonundan bəri İranda davam edən hökumət əleyhinə etirazlar fonunda yayılıb.
İranlı rəsmilər ABŞ və İsraili baş verən hadisələri “üsyan” və “terror” kimi qiymətləndirərək dəstəkləməkdə ittiham ediblər.
Ölənlərin sayı rəsmi olaraq açıqlanmayıb, lakin mərkəzi qərargahı ABŞ-da yerləşən İnsan Haqları Aktivistləri Xəbər Agentliyi etirazçılar və təhlükəsizlik qüvvələri də daxil olmaqla 2 mindən çox insanın həlak olduğunu təxmin edir.
Bundan əlavə, İran hökuməti Vaşinqtonu hərbi müdaxilə üçün əsas yaratmağa çalışmaqda ittiham edib.
Yanvarın 13-də “X” platformasında yayımlanan paylaşımda İranın Birləşmiş Millətlər Təşkilatı yanındakı missiyası Vaşinqtonun İran siyasətinin rejim dəyişikliyinə əsaslandığını bildirib.
Açıqlamada deyilib: “Sanksiyalar, təhdidlər, qızışdırılmış iğtişaşlar və xaos hərbi müdaxilə üçün əsas yaratmaq üsulu kimi istifadə olunur”.
Missiya əlavə edib ki, Vaşinqtonun “oyun planı yenə də uğursuz olacaq”.
Bu açıqlamalar ABŞ prezidenti Donald Trampın İranın etirazlara sərt müdaxiləsinə cavab olaraq “güclü addımlar” atmaqla hədələməsindən sonra səsləndirilib.
