Türkiyənin Nəqliyyat və İnfrastruktur nazirinin müavini Ömər Fatih Sayan oktyabrın 3-də verdiyi açıqlamada qeyd edib ki, planlaşdırılan 5G texnologiyası və onun ardınca başlayacaq təşəbbüslər Türkiyə iqtisadiyyatına 2030-cu ilə qədər 100 milyard dollar qazanc təmin etməyi, eyni zamanda 1,5 milyon yeni məşğulluq potensialı yaratmağı hədəfləyir.
Bu barədə Ömər Fatih Sayan yerli sosial media platforması "Next Sosyal" üzərindən paylaşımında yazıb: “TBMM-nin yeni qanunvericilik ilinə 5G texnologiyası ilə başlaması, rəqəmsal transformasiya yolundakı qətiyyətin konkret göstəricisidir.”
Ö.Fatih Sayan parlament binasında başlanan sözügedən pilot tətbiqi “ölkənin hər yerində hədəflənən yüksək sürətli bağlantının qabaqcıl vizyonu” kimi xarakterizə edib.
Nazir müavini həmçinin bildirib ki, bu addım təkcə texnoloji irəliləyiş deyil, eyni zamanda Milli Texnologiya Hərəkatı və Türkiyə Yüzilinin ən mühüm dəstəkçilərindən biridir.
Onun sözlərinə görə, əsas məqsəd ölkə əhalisinin hər bir nümayəndəsinin yüksək sürətli bağlantının gətirəcəyi iqtisadi rifahdan, artan təhlükəsizlikdən, keyfiyyətli səhiyyə və təhsil imkanlarından faydalanmasıdır.
Ö.Fatih Sayan deyib: “Türkiyənin rəqəmsal gələcəyini müəyyən olunmuş milli standartlara və sarsılmaz qətiyyətə əsaslanaraq, təhlükəsiz və şəffaf şəkildə qurmağa davam edəcəyik.”
Qeyd edək ki, Türkiyə dövləti 5G texnologiyasını tam şəkildə tətbiq etməyi və gələn ilin aprel ayından etibarən bir çox sektorda çevik dəyişikliklərə başlamağı planlaşdırır.
Xatırladaq ki, ölkə mobil rabitəyə 1991-ci ildə 1G ilə keçid edib, ardınca 1994-də 2G, 2009-da 3G və 2016-da 4.5G ilə bu istiqamətdə irəliləyib. 5G üçün hazırlıqlar 2019-cu ildən etibarən həyata keçirilib və hazırda son mərhələyə çatdırılıb.
Bu il avqust ayında 5G paylanması üçün minimum tezlik dəyərləri rəsmi olaraq açıqlanıb. Ümumilikdə 11 tezlik paketi üçün minimum tezlik dəyəri 2,1 milyard dollar olaraq müəyyən edilib.
Türkiyə Rabitə və İnformasiya Texnologiyaları Qurumunun (BTK) hazırladığı 5G hərrac elanının mətni isə avqustun 31-də Prezident fərmanı ilə yayımlanıb.
5G texnologiyasının sınaq tətbiqləri Türkiyənin dörd böyük futbol klubunun stadionlarında, İGA İstanbul Hava Limanında, TBMM-də və ölkə üzrə təxminən 30 müxtəlif müəssisədə həyata keçirilib.
