İran ABŞ ilə artan gərginliyi azaltmaq üçün diplomatik yolları nəzərdən keçirir

İran ABŞ ilə artan gərginliyi azaltmaq üçün diplomatik yolları nəzərdən keçirir. ABŞ Hərbi Dəniz Qüvvələrinin bölgədəki hərbi mövcudluğunu artırmasına baxmayaraq rəsmi Tehran Vaşinqtonla danışıqlara ehtiyatla münasibət göstərir.

İran Xarici İşlər Nazirliyinin sözçüsü Esmail Baqayi fevralın 2-də verdiyi bəyanatda Tehranın müxtəlif diplomatik proseslərin təfərrüatlarını nəzərdən keçirdiyini bildirib. O, yaxın günlərdə müsbət nəticələrin əldə olunacağına ümid etdiyini vurğulayaraq deyib: ‘‘Region ölkələri tərəflər arasında ötürülən mesajların vasitəçiləridir. Hazırda hər bir diplomatik prosesin detalları üzərində işləyirik’’.

Bu açıqlamalar ABŞ Prezidenti Donald Trampın ötən həftə İranın Vaşinqtonla "ciddi danışıqlar apardığına" dair verdiyi bəyanatla üst-üstə düşür. İranın yüksək vəzifəli rəsmisi Əli Laricani də rəsmi "X" platformasında danışıqlar üçün müvafiq mexanizmlərin hazırlandığını təsdiqləyib.

Hələlik heç bir tərəf birbaşa dialoqu rəsmi şəkildə təsdiqləməsə də, sinxron şəkildə verilən bu mesajlar bölgədəki hərbi gərginliyin genişmiqyaslı müharibəyə çevrilməməsi üçün pərdəarxası təmasların intensivləşdiyini göstərir.