Prezident Rəcəb Tayyib Ərdoğan iki Aralıq dənizi ölkəsi arasında müdafiə əlaqələrini gücləndirmək və ticarət əlaqələrini dərinləşdirmək üçün Romada İtaliyanın Baş naziri Meloni ilə görüşüb. Bundan əlavə, iki ölkə arasında ticarət əlaqələrini inkişaf etdirmək üçün 500-dən çox İtaliya və Türkiyə iş adamı ticarət forumunda bir araya gəlib.
Dövlət başçısı Ərdoğan və İtaliyanın Baş naziri Corcia Meloni (Giorgia Meloni) iki ölkə arasında dördüncü hökumətlərarası sammit üçün Romada bir araya gəlib. Görüş ikitərəfli münasibətlərin müdafiə və ticarət sahələrində geniş vüsət aldığı və möhkəmləndiyi bir vaxta təsadüf edir.
İki lider daha əvvəl BMT-dən NATO sammitlərinə qədər müxtəlif çoxtərəfli platformalarda görüşüb və Ukraynadakı müharibə, Suriya hökumətinin beynəlxalq aləmə inteqrasiyası, müdafiə və ticarət əməkdaşlığının gücləndirilməsi də daxil olmaqla bir sıra geosiyasi məsələləri müzakirə ediblər.
Müdafiə sahəsində əməkdaşlıq dərinləşən bu tərəfdaşlığın mühüm sahəsi kimi önə çıxır. Aprelin 7-də İtaliyanın müdafiə naziri Guido Krosetto iki NATO müttəfiqi arasında hərbi əlaqələri gücləndirmək məqsədilə Türkiyənin müdafiə naziri Yaşar Gülər ilə görüşmək üçün Ankaraya səfər edib.
Bu ilin əvvəlində Azərbaycandan Liviyaya, Ukraynadan Efiopiyaya qədər bir çox bölgədə istifadə edilən sistemləri ilə tanınan Türkiyənin aparıcı pilotsuz uçuş aparatları istehsalçısı "Baykar" İtaliyanın aerokosmik və müdafiə nəhəngi "Leonardo SpA" ilə strateji müqavilə imzalayıb. Ötən ilin sonlarında "Baykar" şirkəti "Piaggio Aerospace" şirkətini də alıb.
"Leonardo SpA" şirkətinin CEO-su Roberto Cingolani ""Baykar" şirkətilə pilotsuz texnologiyalarda yeni referans oyunçusu yaradırıq. Bu texnologiyalar müdafiənin gələcəyində getdikcə mərkəzi rol oynayacaq" deyib.
Bu tərəfdaşlığın Avropanın 100 milyard dollarlıq müdafiə bazarında yeni imkanlara qapı açacağı gözlənilir.
Ticarət həcmini artırmaq
Prezident Ərdoğanın Romaya səfəri təkcə müdafiə sahəsində deyil, həm də ticarət əlaqələrinin gücləndirilməsi baxımından mühüm addımdır. İki lider arasında yüksək səviyyəli siyasi zirvə görüşü ilə yanaşı, iqtisadi əməkdaşlığı dərinləşdirmək və yeni investisiya imkanlarını araşdırmaq üçün 500-dən çox türk və italiyalı sahibkarın bir araya gələcəyi biznes forum keçiriləcək.
Türkiyənin İtaliyadakı səfiri Elif Çomoğlu Ülgenin sözlərinə görə, iki ölkə arasında ticarət həcmi son illərdə əhəmiyyətli dərəcədə artaraq 2019-cu ildəki 10 milyard dollardan 2024-cü ilin sonunda 32,2 milyard dollara çatıb.
"Anadolu" xəbər agentliyinə (AA) açıqlama verən Türkiyə səfiri "Çox həyəcanlıyıq. Düşünürəm ki, buradakı bütün türklər eyni həyəcanı paylaşır" deyib və səfirlik ilə türk və italyan tərəfdaşlarının bu sammitə uzun müddətdir hazırlaşdıqlarını qeyd edib. O, İtaliya tərəfində də oxşar həyəcanın olduğunu vurğulayıb.
Keçən il etibari ilə İtaliya Türkiyəyə əhəmiyyətli investor olmağa davam edir. Hazırda ölkədə 1600-dən çox italyan kapitallı şirkət fəaliyyət göstərir və onların ümumi investisiyaları 5 milyard dollara çatıb. İstanbulda yerləşən türk iş qrupu olan Xarici İqtisadi Əlaqələr Şurasının (DEİK) Türkiyə-İtaliya İş Şurasının rəhbəri Lalə Canderin sözlərinə görə, bu investisiyalar avtomobil, enerji, infrastruktur, logistika, bankçılıq və qida kimi sektorlarda cəmləşib.
Lalə Cander "Anadolu" xəbər agentliyinə verdiyi açıqlamada ""Fiat", "Pirelli", "Eni" və "Barilla" kimi şirkətlər uzun illərdir Türkiyədə effektiv fəaliyyət göstərir" deyib.
"Digər tərəfdən, türk şirkətləri də İtaliyada xüsusilə tekstil, qida və avtomobil sahəsində getdikcə daha çox fəaliyyət göstərir. Yüksək texnologiya və Ar-Ge (Tədqiqat və inkişaf) yönümlü sərmayələrə doğru aydın bir keçid var ki, bu da xaricdəki türk kapitalının xarakterində transformasiya olduğunu göstərir”, -deyə o qeyd edib.
