Lazkiyə şəhərində terror hücumları planlaşdıran DEAŞ terrorçuları zərərsizləşdirilib

Suriya rəsmisi antiterror əməliyyatında iki DEAŞ terrorçusunun öldürüldüyünü, digərlərinin isə saxlanıldığını, lakin toqquşmada bir Suriya kəşfiyyat zabitinin də ağır yaralandığını bildirib.

Suriya Daxili İşlər Nazirliyi qeyd edib ki, DEAŞ ilə əlaqəli terror qruplaşmasının üzvləri hücum planlaşdırmazdan əvvəl ölkənin sahil bölgəsində tutulub zərərsizləşdirilib.

Xəbər agentliyi SANA-nın məlumatına görə, Lazkiyədə daxili təhlükəsizlikdən məsul olan briqada generalı Əbdüləziz Hilal əl-Əhməd qruplaşmanın noyabrın 24-də Lazkiyə kəndinin şimalındakı Bədrousiye bölgəsində "həssas təhlükəsizlik əməliyyatı"nda hədəfə alındığını bildirib. Məmulata görə, terror qruplaşması Suriyanın sahil bölgəsində terror hücumları planlaşdırırmış.

General əl-Əhməd bildirib ki, təhlükəsizlik qüvvələri ilə DEAŞ üzvləri arasında baş verən toqquşmalarda iki qruplaşma üzvü öldürülüb, qalanları isə saxlanılıb. O, əsir götürülənlərin sayı barədə ətraflı məlumat verməyib, lakin əlavə edib ki, toqquşmada bir kəşfiyyat zabiti ağır yaralanıb.

Əməliyyat zamanı müxtəlif silah və sursat ələ keçirilib.

2024-cü ilin sonlarında Bəşər Əsədin devrilməsindən sonra Suriyanın yeni rəhbərliyi təhlükəsizliyin bərpasına, islahatların təşviqinə, sosial birliyin gücləndirilməsinə, regional və qlobal qüvvələrlə əməkdaşlığın artırılmasına diqqət yetirib.

Təxminən 25 ildir rejimin lideri olan Bəşər Əsəd ötən ilin dekabr ayında Rusiyaya qaçıb və bu da 1963-cü ildən bəri hakimiyyətdə olan Bəəs Partiyasının hakimiyyətinin sonuna gətirib çıxarıb.

Yanvar ayında prezident Əhməd əl-Şaraanın rəhbərliyi altında yeni keçid administrasiyası yaradılıb.