Danimarkanın Baş naziri Trampı Qrenlandiyanı ələ keçirməklə bağlı təhdidlərdən imtina etməyə çağırıb
Frederiksen bu açıqlamanı ABŞ prezidenti Donald Trampın "The Atlantic" jurnalına verdiyi müsahibədə Qrenlandiyanı ələ keçirmək istəyini təkrarlamasından sonra verib
Danimarkanın Baş naziri Mette Frederiksen deyib: "ABŞ-ın Danimarka Krallığındakı üç ölkədən heç birini ilhaq etmək hüququ yoxdur". Frederiksen bu açıqlamanı ABŞ prezidenti Donald Trampın "The Atlantic" jurnalına verdiyi müsahibədə Qrenlandiyanı ələ keçirmək istəyini təkrarlamasından sonra verib.
Frederiksen yanvarın 4-də verdiyi açıqlamada deyib: "ABŞ-ın Qrenlandiyanı ələ keçirməsinin vacibliyindən danışmasının mənası yoxdur. ABŞ-ın Danimarka Krallığındakı üç ölkədən heç birini ilhaq etmək hüququ yoxdur".
Tramp müsahibədə demişdi ti, bizə Qrenlandiya müdafiə üçün mütləq lazımdır.
Bu açıqlama ABŞ-ın Venesuela prezidenti Nikolas Maduronu qaçırmasından və ABŞ Prezidentinin Vaşinqtonun Latın Amerikası ölkəsini idarə edəcəyini deməsindən bir gün sonra verilib.
Bu vəziyyət Danimarkada eyni şeyin Danimarka ərazisi olan Qrenlandiyada da baş verə biləcəyi ilə bağlı narahatlıqlar yaradıb.
Frederiksen bildirib: "ABŞ-a tarixən yaxın müttəfiqə və çox açıq şəkildə satış üçün olmadığını bildirən başqa bir ölkəyə və başqa bir xalqa qarşı təhdidlərini dayandırmağı tövsiyə edirəm".
Strateji əhəmiyyətə sahib ada
Qeyd edək ki, 21 dekabrda Tramp Luiziana qubernatoru Ceff Landryni Qrenlandiyaya xüsusi elçi təyin edib. Bu addım Vaşinqtonun Arktika bölgəsində yerləşən bu minerallarla zəngin adaya marağı səbəbindən Danimarka və Qrenlandiya tərəfindən tənqidlərə səbəb olub.
Tramp Danimarkanın özünüidarə edən ərazisi olan Qrenlandiyanın ABŞ-ın bir hissəsi olmasını müdafiə edib. Landry də bu ideyanı açıq şəkildə dəstəkləyir.
Qrenlandiyanın Avropa və Şimali Amerika arasındakı strateji mövqeyi onu ABŞ-ın ballistik raketdən müdafiə sistemi üçün vacib bir yerə çevirir, mineral zənginliyi isə ABŞ-ın Çin ixracatından asılılığını azaltmaq üçün cəlbedici bir xüsusiyyətdir.
Keçmiş Danimarka müstəmləkəsi olan Qrenlandiyanın 2009-cu il müqaviləsinə əsasən müstəqillik elan etmək hüququ var, lakin əsasən Danimarka yardımından asılıdır.
Son bir ildə Danimarka Qrenlandiya ilə gərgin münasibətlərini bərpa etməyə çalışarkən, eyni zamanda Tramp administrasiyası ilə gərginliyi azaltmaq üçün Arktikanın müdafiəsinə investisiya qoyub.