ABŞ mediasının yaydığı məlumata görə, ABŞ hərbçiləri Qəzza atəşkəsi sazişinin həyata keçirilməsini nəzarətdə saxlamaq məqsədilə yaradılacaq çoxmillətli missiyaya qoşulmaq üçün oktyabrın 11-də (bu gün) İsrailə gəlməyə başlayıblar.
“ABC News”un iki ABŞ rəsmisinə istinadən verdiyi xəbərdə bildirilib ki, təxminən 200 nəfərlik heyət atəşkəs sazişinə nəzarət üzrə koordinasiya mərkəzi yaratmaqla vəzifələndirilib.
Qeyd olunub ki, bu qrup logistika, təhlükəsizlik, nəqliyyat, planlaşdırma və mühəndislik sahələrində fəaliyyət göstərəcək.
Xəbərdə vurğulanıb ki, ABŞ hərbçiləri ancaq İsraildə qalacaq və Qəzzaya daxil olmayacaqlar. Missiya ABŞ Mərkəzi Komandanlığının (CENTCOM) rəhbəri admiral Bredli Kuperin komandanlığı altında icra ediləcək və bölgədəki ölkələrin qüvvələri ilə əməkdaşlıq şəklində həyata keçiriləcək.
D.Trampın 20 maddəlik planı
Bu yerləşdirmə ABŞ prezidenti Donald Trampın oktyabrın 8-də açıqladığı bəyanatdan sonra reallaşıb. D.Tramp İsrail və “Həmas”ın 29 sentyabrda Qəzzaya qarşı aparılan soyqırım xarakterli müharibəni dayandırmaq üçün irəli sürülən 20 maddəlik planın ilk mərhələsi barədə razılığa gəldiklərini bildirmişdi.
Razılaşmaya əsasən, ”Həmas” bütün israilli əsirləri azad edəcək, qarşılığında isə təxminən 2.000 fələstinli məhbus buraxılacaq. İsrail isə mərhələli şəkildə Qəzzadan geri çəkiləcək.
İkinci mərhələdə “Həmas”ın iştirakı olmadan Qəzzada yeni idarəetmə mexanizminin yaradılması, fələstinlilər və müsəlmanlardan ibarət birgə təhlükəsizlik qüvvəsinin qurulması və “Həmas”ın silahsızlaşdırılması nəzərdə tutulur.
Xatırladaq ki, 2023-cü ilin oktyabrından bəri İsrailin hücumları nəticəsində əksəriyyəti qadın və uşaq olmaqla təxminən 67 min 200 fələstinli həyatını itirib. Bu müddət ərzində Qəzza demək olar ki, yaşanılmaz vəziyyətə düşüb.
