Antonio Quterreş Qvineya-Bisauda baş verən çevrilişə görə narahatlığını bildirib

Birləşmiş Millətlər Təşkilatının Baş katibi Antonio Quterreş bu həftə Qvineya-Bisauda ordunun hakimiyyəti ələ keçirməsi və ölkə prezidentinin vəzifədən kənarlaşdırılması ilə bağlı dərin narahatlığını ifadə edib. Quterreşin sözçüsü Stefan Dujarrik noyabrın 27-də yayımladığı bəyanatda konstitusiya qaydasının dərhal və qeyd-şərtsiz bərpasını tələb edib.

S.Dujarrik açıqlamasında bildirib ki, 23 noyabrda keçirilmiş parlament seçkilərdə dinc şəkildə səs verən xalqın iradəsinə məhəl qoymamaq demokratik prinsiplərin qəbuledilməz pozuntusudur.

Qvineya-Bisau ordusu hazırkı prezident Umaro Sissoko Embalonu devirmiş, ölkənin quru, dəniz və hava sərhədlərini bağlamışdır. Hərbçilər çevrilişi hökumətin sabitliyi pozan siyasətlərinə cavab olaraq həyata keçirdiklərini bildiriblər.

Özlərini “Milli Təhlükəsizlik və İctimai Asayişin Bərpası üzrə Ali Hərbi Komandanlıq” adlandıran hərbi qrup bütün dövlət səlahiyyətlərini ələ keçirdiklərini” elan ediblər.

Hərbçilər media yayımını dayandırıb, davam edən seçki prosesini ləğv ediblər, ölkənin bütün sərhədlərini bağlayıblar və yerli vaxtla saat 21:00-da doqquz saatlıq komendant saatı tətbiq ediblər.

Çevriliş baş verərkən, həftəsonu ölkədə prezident seçkilərinin nəticələri bəlli olmalı idi. Müstəqil namizəd Fernando Dias və Embalonun komandasının bazar ertəsi günü qələbə elan etdiyi bildirilmişdi. Lakin hərbçilər daha sonra ölkənin yeni lideri vəzifəsinə general təyin edilmiş bir şəxs seçiblər.

Qvineya-Bisau Qərbi Afrika ölkəsidir və 1974-cü ildə müstəqilliyini elan edib.