Tramp Putinin Ukraynadakı müharibəyə son qoymaq istədiyini bildirib

ABŞ prezidenti Vitkoff və Kuşnerin Putinlə "kifayət qədər yaxşı" danışıqlar apardığını, Kremlin isə əsas tələblər üzrə hələ də "razılığın olmadığını" xəbərdar etdiyini bildirib.

Vaşinqton yenidən işlənmiş sülh planı layihəsi üçün təzyiq göstərməyə davam edərkən, ABŞ prezidenti Donald Tramp Ağ Evdə jurnalistlərə Rusiya prezidenti Vladimir Putinin Ukraynadakı "müharibəyə son qoymaq istədiyini" söyləyib.

Tramp dekabrın 2-də Moskvada Putinlə görüşən ABŞ-ın xüsusi elçisi Stiv Vitkoff və onun kürəkəni və müşaviri Cared Kuşnerlə görüşdüyünü bildirərək deyib: "Deyə bilərəm ki, onlar Prezident Putinlə olduqca yaxşı görüş keçirdilər. Görəcəyik. Həmin görüşdən nə nəticə çıxacağını sizə deyə bilmərəm".

Tramp Moskvadakı danışıqları "olduqca yaxşı görüş" adlandırıb və Rusiyanın münaqişəyə son qoymaq üçün "qətiyyətlə" razılaşma istədiyini söyləyib. O, əlavə edib ki, görüşün nəticəsinə zəmanət verə bilmərəm.

"Razılıq yoxdur"

Vitkoff və Kuşner razılaşma istiqamətində hər hansı irəliləyiş açıqlanmasa da danışıqları dekabrın 3-də səhər radələrinə qədər davam etdiriblər.

Kreml ərazi güzəştləri və Moskvanın hələ də "əsas" narahatlıq hesab etdiyi Ukraynanın NATO üzvlüyü də daxil olmaqla, vacib hesab etdikləri məsələlərdə heç bir "razılıq" əldə olunmadığını bildirib.

Ağ Ev İkinci Dünya Müharibəsindən bəri Avropanın ən pis münaqişəsi adlandırdığı münaqişəyə son qoymaq planına açıq şəkildə nikbin yanaşırdı.

Lakin, dekabrın 3-də Moskvanın yenidən işlənmiş planın bəzi maddələrini "qəbuledilməz" hesab etdiyini bildirməsi ilə bu nikbinlik yox oldu.

Danışıqlarda iştirak edən Putinin xarici siyasət üzrə müşaviri Yuri Uşakov Rusiya qüvvələrinin son həftələrdə əldə etdiyi nailiyyətlərin danışıqların atmosferini formalaşdırdığını söyləyərək jurnalistlərə deyib: "Son həftələrdə Rusiya ordusunun sahədəki uğurları danışıqların irəliləyişinə və təbiətinə təsir etdi. Əsgərlərimizin hərbi uğurları sayəsində xarici tərəfdaşlarımızın mümkün sülh yolları ilə bağlı qiymətləndirmələrini daha müsbət hala gətirməyə töhfə verdik".