İsrail Qəzzanın qeyri-qanuni mühasirəyə alınmasına etiraz edən yardım donanmasının 171 üzvünü deportasiya edib.

İsrail Xarici İşlər Nazirliyi Qlobal Qətiyyət Donanmasının 171 üzvünün Yunanıstan və Slovakiyaya deportasiya olunduğunu açıqlayıb. Deportasiya edilən şəxslər arasında isveçli fəal Qreta Tunberq də var.

Nazirliyin məlumatına görə, deportasiya olunanlar Yunanıstan, İtaliya, Fransa, İrlandiya, İsveç, Polşa, Almaniya, Bolqarıstan, Litva, Avstriya, Lüksemburq, Finlandiya, Danimarka, Slovakiya, İsveçrə, Norveç, Böyük Britaniya, Serbiya və ABŞ vətəndaşlarıdır.

Britaniyanın “The Guardian” qəzetinin yaydığı məlumata əsasən, Qreta Tunberq İsveç rəsmilərinə verdiyi açıqlamada İsraildə yataq qurdları ilə dolu bir kamerada saxlanıldığını bildirib.

Türkiyəli fəal Ersin Çelik isə ‘‘Anadolu’’ xəbər agentliyinə verdiyi müsahibədə qeyd edib ki, "İsrail qüvvələri gözümüzün qarşısında Qretaya ağır işgəncələr verdilər və onu İsrail bayrağını öpməyə məcbur etdilər".

İsrail son günlərdə təxminən 170 donanma üzvünü deportasiya edib. Onların əksəriyyəti İstanbula, digərləri isə İtaliya və İspaniyaya göndərilib. Bu məlumatı İsraildə fəaliyyət göstərən hüquq mərkəzi Adalah yayıb.

Qeyd edək ki, İsrail Hərbi Dəniz Qüvvələri oktyabrın 1-də gecə saatlarında Qlobal Qətiyyət Donanmasına məxsus gəmilərə hücum edərək 470-dən çox donanma üzvünü saxlamışdı. Donanmanın əsas məqsədi Qəzzaya humanitar yardım çatdırmaq və İsrailin əraziyə tətbiq etdiyi mühasirəyə etiraz etmək idi.

İsrail təxminən 18 ildir ki, 2,4 milyon əhalisi olan Qəzza zolağını mühasirədə saxlayır. 2023-cü ilin oktyabrından bu yana İsrailin hava hücumları nəticəsində əksəriyyəti qadın və uşaqlar olmaqla 67.200-dən çox fələstinli həyatını itirib, ərazi yaşayış üçün yararsız hala düşüb. Davam edən blokada Qəzza əhalisini aclıq və humanitar fəlakətlə üz-üzə qoyub.