Kolumbiyada məktəb avtobusunun qəzaya uğraması nəticəsində 17 adam ölüb, 20 nəfər yaralanıb

Kolumbiyanın şimalında yerləşən kənd ərazisində məktəb şagirdlərini daşıyan avtobusun uçuruma aşması nəticəsində 17 adam həyatını itirib, 20 nəfər isə müxtəlif dərəcəli bədən xəsarətləri alıb.

Antiokiya vilayətinin qubernatoru Andres Julian dekabrın 14-də “X” sosial şəbəkəsində paylaşdığı məlumatda bildirib ki, şəhər məktəbinin şagirdlərini daşıyan avtobus ekskursiya başa çatdıqdan sonra Karib dənizi sahilində yerləşən Tolu qəsəbəsindən Medellin şəhəri istiqamətində yola düşüb.

Qubernatorun sözlərinə görə, şagirdlər səfər zamanı çimərlikdə məzuniyyətlərini qeyd ediblər. Andres Julian baş verən hadisə ilə bağlı deyib: “Bu tragediya dekabr ayında bütün xalq üçün son dərəcə ağır bir xəbərdir.”

Bildirilir ki, xilasetmə qrupları sağ qalanları təhlükəli ərazidən xərək vasitəsilə çıxarıblar.

Kolumbiya prezidenti Qustavo Petro da “X” platformasında paylaşım edərək, hadisədən zərər çəkmiş ailələrə başsağlığı verib. Prezident bildirib: “Gənclərin ölməsini sevmirəm. Xüsusilə də onların oxumaq və ya xoşbəxt şəkildə dincəlmək üçün yola çıxdıqları bir vaxtda həyatlarını itirməsi məni daha çox sarsıdır.”