H.Fidan Brüsseldə keçiriləcək NATO toplantısında iştirak edəcək

Türkiyə Respublikasının xarici işlər naziri Hakan Fidan alyansın baş qərargahında keçiriləcək NATO Xarici İşlər Nazirləri Toplantısında iştirak etmək üçün dekabrın 3-də Brüsselə səfər edəcək. Bu barədə Türkiyə Xarici İşlər Nazirliyi dekabrın 2-də (bu gün) məlumat yayıb.

Məlumatda qeyd edilib ki, nazir H.Fidan toplantı çərçivəsində NATO-nun baş katibi Mark Rutte, Avropa İttifaqının xarici siyasət üzrə nümayəndəsi Kaya Kallas, Aİ-nin Genişləndirmə üzrə komissarı Marta Kos, Böyük Britaniyanın xarici işlər naziri Yvette Kuper, İspaniyanın xarici işlər naziri Xose Manuel Albares və digər tərəfdaşlarla bir sıra ikitərəfli görüşlər keçirəcək.

Bildirilir ki, bu il keçirilən nazirlər toplantısı xüsusi əhəmiyyət daşıyır. Belə ki, iyun ayında Haaqada qəbul edilən qərarlar yenidən nəzərdən keçiriləcək. Həmçinin bu toplantıda Türkiyənin 2026-cı il 7–8 iyul tarixlərində Ankarada ev sahibliyi edəcəyi NATO Liderlər Zirvəsi ərəfəsində xarici işlər nazirləri ilk əhatəli fikir mübadiləsi aparacaqlar.

Toplantı iki sessiyadan ibarət olacaq

İlk sessiya NATO-nun xarici işlər nazirlərinə həsr olunacaq və alyansın gündəliyində olan əsas məsələlər müzakirə ediləcək. Danışıqlarda Rusiya–Ukrayna müharibəsi əsas mövzu olacaq.

Nazirlər həmçinin NATO-nun şərq cinahındakı son vəziyyəti, alyansın cənubdakı qonşularından qaynaqlanan problemləri, Balkanlardakı vəziyyəti və Asiya–Sakit okean bölgəsindəki proseslərin Avro–Atlantik məkanının təhlükəsizliyinə təsirlərini qiymətləndirəcəklər.

Diplomatik mənbələr bildirir ki, H.Fidan Türkiyənin müasir hərbi imkanları və müdafiə sənayesi vasitəsilə NATO və Avropa təhlükəsizliyinə verdiyi güclü töhfələri vurğulayacaq.

Bundan əlavə, H.Fidanın müttəfiqlərini Ankara zirvəsinə hazırlıq barədə məlumatlandırması, Avropanın müdafiə sahəsinin gücləndirilməsi səylərinin NATO-nun fəaliyyəti ilə tamamlayıcı olması gərəkdiyini xatırlatması və Aİ-nin müdafiə təşəbbüslərinin Aİ-yə üzv olmayan bütün müttəfiqlərə açıq qalmasının vacibliyini qeyd etməsi gözlənilir.

Həmçinin nazir H.Fidanın müttəfiqlər arasında müdafiə sənayesi əməkdaşlığının qarşısındakı maneələrin aradan qaldırılması gözləntisini də yenidən dilə gətirəcəyi bildirilir.

Ukrayna müharibəsi

Toplantının ikinci sessiyasında Ukraynanın xarici işlər naziri Andrey Sibiqa və Aİ-nin xarici siyasət üzrə nümayəndəsi Kaya Kallasın iştirakı ilə NATO–Ukrayna Şurası toplanacaq.

Görüşlər müharibənin gedişatı, münaqişənin dayandırılmasına yönəlmiş diplomatik təşəbbüslər və Ukraynanın islahat gündəmi üzərində cəmləşəcək.

Bildirilir ki,  Türkiyə XİN rəhbəri H.Fidan rəsmi Ankaranın Ukraynanın müstəqilliyinə, suverenliyinə və ərazi bütövlüyünə dəstəyini bir daha vurğulayacaq, Ankara hökumətinin göstərdiyi yardımlarla bağlı təfərruatlı məlumat paylaşacaq, ədalətli və uzunmüddətli sülhün təmin olunması üçün diplomatiyaya imkan verilməsinin vacibliyini qeyd edəcək.

Bununla da Türkiyənin müharibənin sona çatdırılması, Avro–Atlantik məkanda sabitliyin təmin edilməsinə yönəlmiş təşəbbüsləri dəstəkləməyə və bütün tərəflərlə dialoqu davam etdirməyə sadiq olduğu bir daha vurğulanacaq.