Ukrayna Prezidenti Volodimir Zelenski rəsmi internet səhifəsində etdiyi paylaşımda Rusiyanın "Mi-Ukrayna" telekanalının binasını pilotsuz uçuş aparatı ilə hədəf aldığını qeyd edib. V. Zelenski hücum nəticəsində binanın bir hissəsinin dağıldığını və 5 nəfərin yaralandığını diqqətə çatdırıb. O, aidiyyəti qurumların hadisə yerinə cəlb olunduğunu və Fövqəladə Hallar Xidmətinin əməkdaşlarının yanğını söndürdüyünü bəyan edib.
Rusiyanın media qurumlarını hədəf almasını sərt tənqid edən V. Zelenski telekanalın "Şahed" dronları ilə vurulmasını "Rusiyanın nə qədər aciz vəziyyətə düşdüyünün göstəricisi olduğunu" bildirib. Avropa və dünya ictimaiyyətini bu hücuma reaksiya verməyə çağıran Ukrayna lideri ölkəsinə və mülki əhaliyə qarşı edilən heç bir hücumun cavabsız qalmayacağını vurğulayıb.
Volodimir Zelenski etdiyi digər paylaşımda Rusiyanın Kiyev-Sumı marşrutu ilə hərəkət edən sərnişin qatarına da PUA zərbəsi endirdiyini açıqlayıb. Ukrayna Fövqəladə Hallar Xidmətindən verilən məlumata görə, bu hadisə zamanı ölən və ya xəsarət alan olmayıb, 90 sərnişin təhlükəsiz əraziyə təxliyə edilib.
