Netanyahunun ofisi hücumlar, ABŞ-ın təzyiqi və siyasi həssaslıqlar kövrək atəşkəs rejimini gərginləşdirsədə bu təşəbbüsü potensial əməkdaşlığa doğru ilk addım kimi təsvir edib.

Benyamin Netanyahunun ofisinin açıqlamasına görə, Netanyahu Livanda hökumət və iqtisadi rəsmilərlə görüşmək üçün nümayəndə göndərəcək.

Baş nazirin ofisindən verilən açıqlamada deyilir: "Netanyahu Milli Təhlükəsizlik Şurasının direktoru vəzifəsini icra edən şəxsə onun adından Livanda hökumət və iqtisadi rəsmilərlə görüşə nümayəndə göndərməyi tapşırıb. Bu, İsrail ilə Livan arasında münasibətlərin qurulması və iqtisadi əməkdaşlığın əsasının qoyulması üçün ilkin təşəbbüsdür".

Qeyd edək ki, Beyrut cənubdakı qonşusunu rəsmi olaraq tanımır və iki ölkə arasındakı münasibətlər son dərəcə həssasdır.

Atəşkəsin ildönümü daha çox hücumla qeyd olunub

Bu açıqlama İsrail ilə Livanda yerləşən Hizbullah militant qrupu arasında kövrək atəşkəsin birinci ildönümündən bir neçə gün sonra verilib.

Lakin İsrail atəşkəsə baxmayaraq Livanı dəfələrlə bombalayıb və bunun Hizbullah üzvlərini və infrastrukturu hədəf aldığını və qrupun hərbi potensialını bərpa etməsinin qarşısını almağı hədəflədiyini iddia edib.

İsrail son həftələrdə hücumlarını artırıb.

Atəşkəsin ildönümündə İsrail ordusu atəşkəs dövründə təxminən 1200 "hədəf əməliyyatı" həyata keçirdiyini və "370-dən çox terrorçunu zərərsizləşdirdiyini" iddia edib.

ABŞ Beyrutu Hizbullahı tərksilah etməyə çağırır

ABŞ Livan hökumətinə Hizbullahı tez bir zamanda tərksilah etmək üçün təzyiq göstərir və Livanla İsrail arasında birbaşa danışıqların aparılmasına təkid edir.

İsrailin xarici işlər naziri Gideon Saar ABŞ-ın Livan üzrə xüsusi nümayəndəsi Morqan Ortaqus ilə görüşüb.

Saar "X" platformasında ezdiyi paylaşımda deyib: "Livandakı vəziyyətlə bağlı yaxşı müzakirə apardıq. Mən Hizbullahın Livanın suverenliyini pozduğunu bildirdim. Hizbullahın tərksilah edilməsi Livanın gələcəyi və İsrailin təhlükəsizliyi üçün vacibdir. ABŞ bizim ən böyük müttəfiqimizdir və sıx əməkdaşlığımızı davam etdirəcəyik!".

İsrail mediasının məlumatına görə, Ortaqus İsrailə səfəri zamanı Netanyahu ilə də görüşüb.

Livan Atəşkəs İdarəsinə mülki nümayəndə təyin edib

Livan ABŞ-ın tələbi ilə İsraillə atəşkəsə nəzarət edən quruma göndərəcəyi nümayəndə heyətinə mülki şəxsin rəhbərlik edəcəyini açıqlayıb.

İndiyə qədər Livan hərbi məmurun növbədə olmasında israr edirdi və hərbi nümayəndələri İsrail nümayəndə heyəti ilə birbaşa təmasdan yayınırdılar.

Mülki nümayəndənin təyin edilməsi Livanın İsraillə danışıqlara hazır olduğunu bəyan etməsindən sonra baş verib.