R.T.Ərdoğan DEAŞ-a qarşı mübarizənin gücləndiyini bildirib
Həmçinin Suriyanın şimalında separatçı terror təhlükəsinin aradan qaldırılmasının bütün region üçün rahatlıq yaradacağı qeyd olunub
Türkiyə Respublikasının Prezidenti Rəcəb Tayyib Ərdoğan yanvarın 24-də Türkiyənin Aydın vilayətində yeni inşa olunan yaşayış binalarının açar təhvil-təslim mərasimində iştirak edib. Tədbirdə çıxış edən dövlət başçısı DEAŞ terror təşkilatına qarşı mübarizənin hər ötən gün daha qətiyyətli və güclü şəkildə davam etdirildiyini vurğulayaraq, regiondakı bütün terror ünsürlərinin kökünün kəsildiyini bəyan edib. Həmçinin Suriyanın şimalındakı separatçı terror təhlükəsi aradan qaldırıldığı təqdirdə, bunun təkcə Suriya xalqına deyil, bütün regiona rahatlıq gətirəcəyini qeyd edib.
Ərazi bütövlüyünü təmin etmiş təhlükəsiz və sabit Suriyanın bütün icmalar üçün faydalı olacağını bildirən Prezident R.T.Ərdoğan deyib: “Birləşmiş, bütöv və təhlükəsiz Suriyanın qalibləri ərəblər, türkmənlər, kürdlər, ələvilər, druzilər, xristianlar və bütün suriyalı vətəndaşlar olacaq.”
Qlobal siyasətə də toxunan ölkə rəhbəri R.T.Ərdoğan bu həftə keçirilən Dünya İqtisadi Forumu çərçivəsində aparılan müzakirələrin Türkiyənin uzun müddətdir səsləndirdiyi qlobal sistemə dair tənqidlərin Qərb dünyasında getdikcə daha geniş qarşılıq tapdığını göstərdiyini bildirib.