Rəsmi Pekin Vaşinqton rəhbərliyinin Arktika bölgəsindəki “eqoist” maraqları naminə Çin və Rusiyanı “bəhanə” kimi göstərən ABŞ prezidenti Donald Trampın açıqlamalarına etiraz edib.
Çin Xarici İşlər Nazirliyinin sözçüsü Mao Nin yanvarın 12-də (bu gün) verdiyi açıqlamada deyib: “Arktika bölgəsi beynəlxalq ictimaiyyətin ümumi maraqlarını əhatə edir və Çinin Arktika bölgəsindəki fəaliyyəti sülhə və sabitliyə, dayanıqlı inkişafa və beynəlxalq hüquqa töhfə verir. ABŞ-ın Çin və ya Rusiyanı bəhanə edərək qazanc dalınca düşməsini məqbul etmirik. Bölgədə fəaliyyət göstərmək hüququ və azadlığı olan bütün ölkələrə tam hörmət göstərilməlidir.”
Pekin hökumətinin bu açıqlamaları D. Trampın yanvarın 11-də Qrenlandiyanı ələ keçirməyin ABŞ üçün zəruri olduğunu deməsindən sonra səsləndirilib. D.Tramp həmin açıqlamasında bunun Danimarkaya bağlı strateji Arktika bölgəsinin Rusiya və ya Çinin nəzarətinə keçməsinin qarşısını almaq məqsədi daşıdığını bildirib.
D.Tramp Florida ştatından Vaşinqtona səfəri sırasında jurnalistlərə deyib: “Əgər Qrenlandiyanı almasaq, onu Rusiya və ya Çin ələ keçirəcək və biz buna imkan verməyəcəyik. Ancaq hər bir halda bir Qrenlandiyanı alacağıq.”
“Anadolu” agentliyinin D.Trampın başqa bir ölkənin suveren ərazisini ələ keçirməyə çalışması ilə bağlı sualına cavab verən Mao Nin bildirib: “Dövlətlərarası münasibətlər BMT Nizamnaməsinin prinsiplərinə uyğun şəkildə aparılmalıdır.”
