Qəzza əhalisinin əsas ehtiyaclarını qarşılamağı hədəfləyən və təxminən 900 ton humanitar yardım daşıyan 17-ci “Xeyirxahlıq Gəmisi” oktyabrın 14-də Türkiyənin cənubundakı Mersin Beynəlxalq limanından Misirin əl-Əriş limanına yola çıxıb.
Bu yardım göndərişi Türkiyə Fövqəladə Halların İdarə Olunması Agentliyi (AFAD) koordinasiyasında və Misir Qızıl Aypara Cəmiyyətinin əməkdaşlığı və 17 qeyri-hökumət təşkilatının dəstəyi ilə həyata keçirilib. Yardımlar Qəzza zolağına ən yaxın liman olan Misirin əl-Əriş limanından “Kərəm Əbu Salim” sərhəd-keçid məntəqəsinə çatdırılacaq.
Qəzza əhalisinin gündəlik ehtiyaclarını qarşılamaq məqsədilə hazırlanan yardım paketlərinə hazır yeməklər, konserv məhsullar və körpə qidaları daxildir.
Mersin limanında keçirilən yola salma mərasimində çıxış edən Türkiyə daxili işlər naziri Əli Yerlikaya deyib: “Bu gün 900 ton ərzaq, konserv və körpə qidaları ilə yüklənmiş Akdeniz gəmisi, inşallah, Qəzza üçün yola çıxır.”
Qeyd edək ki, Türkiyə dövləti İsrailin 2023-cü il oktyabrın 7-də Qəzzaya qarşı soyqırım xarakterli hücumlarına başlamasından bu yana, AFAD koordinasiyasında 16 gəmi və 14 təyyarə ilə bölgəyə humanitar yardım göndərib.
Xatırladaq ki, ABŞ prezidenti Donald Trampın 67 min nəfərdən çox fələstinlinin həyatına son qoyan və bölgəni xarabalığa çevirən soyqırımı daimi olaraq dayandırmaq planı çərçivəsində ötən həftə Qəzzada atəşkəs əldə olunub.
