Hakan Fidan regional prosesləri qiymətləndirib

Türkiyənin xarici işlər naziri Hakan Fidan İranla bağlı münaqişələrin genişlənəcəyi təqdirdə Körfəz ölkələrinin hərəkətə keçməli olacaqları barədə xəbərdarlıq edib.

Səudiyyə Ərəbistanı, Qətər və Birləşmiş Ərəb Əmirliklərinə etdiyi rəsmi səfərlərdən sonra jurnalistlərə açıqlama verən nazir təmasları zamanı rəsmilərin müharibənin daha iki-üç həftə davam edə biləcəyini və regional böhran riskinin artdığını qiymətləndirdiklərini deyib.

Hakan Fidan qeyd edib ki, Körfəz ölkələri öz hava məkanlarını və hərbi bazalarını İrana qarşı əməliyyatlar üçün istifadəyə verməyəcəklərini və bu müharibədə tərəf olmayacaqlarını əvvəlcədən bəyan ediblər. Bununla belə, nazir həmin ölkələrin İranı yalnız hərbi obyektləri deyil, həm də mülki infrastrukturu və iqtisadi resursları qəsdən hədəf almaqda ittiham etdiklərini də diqqətə çatdırıb.

Türkiyənin xarici işlər naziri Hakan Fidan ABŞ və İsrail arasındakı fikir ayrılıqlarının daha da kəskinləşdiyini və bu vəziyyətin münaqişənin gedişatını dəyişə biləcəyini bəyan edib. O, İsrailin ABŞ-a təsir göstərməyə çalışaraq qısa müddətdə atəşkəs və ya sülhün əldə edilməsinə mane olmaq istəyəcəyini vurğulayıb. Nazir deyib ki, Vaşinqton və Tel-Əvivin mövqeləri getdikcə uzaqlaşır və bu barədə ümumi fikir formalaşıb.

Hakan Fidan deyib ki, ziddiyyətlər müharibəni uzada bilər. Aktiv döyüşlər zamanı danışıqlar çətindir, amma qısa atəşkəs dialoq üçün fürsət yarada bilər.

Türkiyənin xarici işlər naziri Hakan Fidan martın 19-da Ər-Riyadda baş tutan görüşün müharibədən birbaşa və ya dolayı yolla təsirlənən region ölkələrini bir araya gətirdiyini bildirib. Nazir qeyd edib ki, bu toplantı regional dövlətlərin mövqelərini öyrənmək və ortaq bir məxrəcə gəlmək məqsədilə təşkil olunub. Görüş iştirakçıları mövcud vəziyyətin olduqca kritik olduğunu xüsusi vurğulayıblar.

Türkiyənin xarici işlər naziri Hakan Fidan bildirib ki, mövcud müharibə regional tarazlıqları yenidən formalaşdıra, Körfəz ölkələrini öz müdafiə strategiyalarına yenidən baxmağa və İranla bağlı gözləntilərini dəqiqləşdirməyə vadar edə bilər. Nazirin sözlərinə görə, münaqişədən sonra müvafiq şərtlər yaranarsa, iqtisadi əməkdaşlıq məsələləri yenidən gündəmə gələ bilər və İran tərəfi ABŞ-ın Körfəzdəki hərbi mövcudluğu ilə bağlı tələblərini irəli sürə bilər.

Böhran dövründə Türkiyənin mövqeyinin daha da gücləndiyini vurğulayan Hakan Fidan rəsmi Ankaranın prosesin əvvəlindən aydın və qətiyyətli bir yol izlədiyini qeyd edib. O, Türkiyənin heç vaxt qeyri-müəyyən mövqe tutmadığını və tərəflərə nələrin yanlış olduğunu açıq şəkildə bildirdiyini diqqətə çatdırıb. Hakan Fidan Türkiyənin həm İsrailin hərbi əməliyyatlarına, həm də İranın müharibəni genişləndirmək cəhdlərinə qarşı çıxdığını xüsusi olaraq vurğulayıb.

Nazir vurğulayıb ki, Türkiyə münaqişənin uzunmüddətli regional müharibəyə çevrilməsini istəmir. Bu səbəbdən rəsmi Ankara bütün diplomatik imkanlardan istifadə edərək müharibəyə son qoymaq istiqamətində səylərini davam etdirəcək.