Livan prezidenti İsrailin Livana endirdiyi zərbələri pisləyib

Livan prezidenti Cozef Aun İsrailin Livanın cənub və şərq bölgələrində bir neçə yaşayış məntəqəsini hədəf almasını kəskin şəkildə pisləyib və təcili təxliyə əmri verib. Məlumata görə, İsrail qüvvələri Sidon şəhərində üçmərtəbəli bir binaya hücum edərək bir nəfəri yaralayıb.

Prezident Aun qeyd edib ki, Livan tərəfinin əməkdaşlığına və hökumətin Litani çayının cənubunda dövlət nəzarətini gücləndirmək üçün atdığı addımlara baxmayaraq İsrailin davam edən hücumları gərginliyin azaldılması üçün göstərilən yerli, regional və beynəlxalq səyləri pozur.

Aun vurğulayıb ki, Livan ordusu bu tədbirləri peşəkarlıq, dəqiqlik və intizamla icra edib.

Prezident beynəlxalq ictimaiyyəti Livanda İsrail hücumlarının qarşısını almaq üçün təcili və effektiv müdaxilə etməyə, həmçinin mexanizm komitəsinin öz mandatını tam yerinə yetirməsini təmin etməyə çağırıb.

İsrail mediası Livan hökuməti və ordusunun Hizbullahın silahlarını məhv etməyəcəyi təqdirdə, İsrailin təşkilatın mövqelərini hədəf alan genişmiqyaslı hücuma hazırlaşdığını iddia edib.

Qeyd edək ki, Livan və İsrail 2024-cü ilin noyabrında bir ildən artıq davam edən sərhədyanı toqquşmalara son qoyan atəşkəs razılaşmasına əməl edir. İki ölkə arasında baş verən qarşıdurmalar nəticəsində 4.000-dən çox insan həlak olub, 17.000-dən çox şəxs yaralanıb.

Atəşkəs razılaşmasına əsasən, İsrail ordusu bu ilin yanvar ayında Livanın cənubundan tamamilə geri çəkilməli idi. Lakin İsrail yalnız qismən geri çəkilib və hazırda beş sərhəd məntəqəsində hərbi mövcudluğunu davam etdirir.