Türkiyə prezidenti Rəcəb Tayyib Ərdoğan deyib: "Qərb ölkələrinin Fələstin dövlətini tanımaq qərarlarını sadə bir tanınma qərarı kimi deyil, iki dövlətli həllə aparan prosesin əsas bünövrəsi kimi görmək istəyirik".
Ərdoğan bu açıqlamaları Misirdə İsrailin Qəzzaya qarşı iki illik müharibəsinə rəsmən son qoyan atəşkəs razılaşmasının imzalanmasından sonra verib.
Ərdoğan "İndiki mərhələdə iki suveren-dövlətli həll istiqamətində səyləri artırmaq faydalıdır. Biz Qərb ölkələrinin, xüsusilə Böyük Britaniya və Fransanın Fələstin dövlətinin tanınması ilə bağlı qərarlarını sadə bir tanınma qərarı kimi deyil, iki dövlətli həllə aparan prosesin əsas bünövrəsi kimi görmək istəyirik. Əks halda, atılan hər hansı addım nəticəsiz qalacaq və məqsədə çatmayacaq. Türkiyə üçün Fələstin məsələsinin yeganə həlli 1967-ci il sərhədlərinə əsaslanan, paytaxtı Şərqi Qüds olan müstəqil, suveren və coğrafi cəhətdən vahid Fələstin dövlətinin qurulmasıdır" deyib.
Qeyd edək ki, Misir, Qətər və Türkiyə ABŞ prezidenti Donald Trampla birlikdə Qəzzada atəşkəs sazişi imzalayıb. İmzalamadan əvvəl Tramp bəyan edib ki, bu sənəd gələcək üçün qayda və nizamlamaları müəyyən edəcək.
Dövlət başçısı "Bizim atdığımız bu imzalar adi imzalar deyil. Bu imzalarla bu sülh iradəsi artıq tarixin salnaməsinə yazıldı" deyib.
“Qəzza soyqırımı unudulmamalıdır”
Prezident Ərdoğan İsrailin atəşkəs rejimini pozmasını tənqid edərək, həm Türkiyə, həm də ABŞ-ın sülh razılaşmasını yerinə yetirməyə sadiq olduğunu bildirib.
Ərdoğan "İsrailin qonşularını işğal etməklə heç bir nəticə əldə edə bilməyəcəyi çox açıqdır. Netanyahu hökumətinin anti-soyqırım reaksiyalarını antisemitizmlə əlaqələndirmək cəhdləri burada nəticəsiz qaldı" deyib.
Ərdoğan Qəzza xalqının üzləşdiyi çətinliklərin unudulmamasının vacibliyi barədə xəbərdarlıq edib və humanitar fəlakətin daha da pisləşməsinin qarşısını almaq üçün diplomatik diqqətin davam etdirilməsinin lazım olduğunu vurğulayıb.
Prezident deyib: “Biz Qəzza soyqırımının unudulmaması üçün mübarizəmizi davam etdirməliyik”.
Ərdoğan həmçinin Trampla qurulan diplomatiyanın mühüm əhəmiyyət kəsb etdiyini bildirib və bunu davam etdirəcəklərini vurğulayıb.
Qəzzanın yenidən qurulması daha güclü dəstək tələb edir
Prezident Ərdoğan bildirib ki, Ankara hazırda Qəzzanın yenidən qurulmasında hansı tərəflərin iştirak edə biləcəyini müzakirə edir və Körfəz ölkələri, ABŞ və Avropanı dəstəkləməyə çağırıb.
Ərdoğan Fələstində dağıdılmış yaşayış məntəqələrində yenidənqurma layihələrinin sürətlə həyata keçirilməsini təmin etmək üçün maliyyənin təmin ediləcəyinə əminliyini ifadə edib.
Qəzzada humanitar vəziyyətə toxunan prezident Qəzzanın yenidən qurulmasının böyük əhəmiyyət kəsb etdiyini bildirib və qış gələnə qədər insanların sığınacaq ehtiyaclarını ödəyəcəyinə söz verib.
Misirin Şarm əl-Şeyx şəhərində keçirilən Qəzza sülh zirvəsindən qayıdan Ərdoğan təyyarədə jurnalistlərə "Qış gələnə qədər Qəzza xalqının sığınacaq ehtiyaclarını ödəmək üçün yorulmadan çalışacağıq" deyib.
Atəşkəs başlayandan bəri Türkiyədən ümumilikdə 350 yük maşınının Qəzzaya daxil olduğunu qeyd edən Ərdoğan HƏMAS-İsrail razılaşmasına görə gündə ən az 600 maşının bölgəyə daxil olmasının nəzərdə tutulduğunu qeyd edib.
