YPG Hələbin kənd ərazilərində Suriya ordusunun mövqelərinə 25 dron hücumu həyata keçirib

Suriya ordusu YPG-nin 25-dən çox FPV tipli partlayıcı dron istifadə edərək Ayn əl-Ərəb bölgəsindəki ordu mövqelərini hədəf aldığını bildirib.

Suriya Ərəb Xəbər Agentliyinin (SANA) məlumatına görə, Suriya ordusu YPG terror təşkilatının Hələbin kəndin ərazilərindəki mövqelərinə 25-dən çox intiharçı dron hücumu həyata keçirərək müddəti yeni uzadılmış atəşkəsi pozduğunu açıqlayıb.

Ordunun Əməliyyatlar Komandanlığı yanvarın 25-də verdiyi açıqlamada YPG qüvvələrinin Ayn əl-Ərəb bölgəsi ətrafındakı Suriya ordusunun mövqelərini 25-dən çox FPV tipli partlayıcı dron istifadə edərək hədəf aldığını bildirib. Hücumlar nəticəsində dörd ordu maşını məhv edilib.

Bəyanatda həmçinin YPG-nin M4 magistral yolunu və yaxınlıqdakı kəndləri hədəf aldığı, çoxsaylı mülki şəxslərin yaralandığı qeyd edilib.

Əməliyyatlar Komandanlığı ordunun hazırda vəziyyəti yerində qiymətləndirdiyini və müdaxilə variantlarını nəzərdən keçirdiyini bildirib.

Bəyanatda deyilir: "Suriya Ordusu mülki şəxslərin və yerləşdirmə məntəqələrinin hədəf alınmasına cavab olaraq əməliyyat variantlarını qiymətləndirir və lazımi tədbirləri görəcək".

Hücumlar Suriya hökumətinin yanvarın 24-də YPG ilə atəşkəsi daha 15 gün uzatmasından bir gün sonra baş verib.

Suriya hökuməti əvvəllər YPG ilə dörd günlük atəşkəsin bitdiyini və rəsmilərin razılaşmanın müddəti bitdikdən sonra atılacaq addımları qiymətləndirdiyini elan etmişdi.