Filippində göyərtəsində 350 nəfər olan bərə batıb, ölənlər olduğu bildirilib
Rəsmilərin məlumatına görə, 316 nəfər xilas edilib, axtarış-xilasetmə əməliyyatları davam edir
Filippinin cənubundakı Basilan əyalətinin sahillərində 350-dən çox sərnişin daşıyan bərənin batdığı, ən azı 15 nəfərin öldüyü bildirilib.
"GMA News Online"ın məlumatına görə, 43 nəfər də itkin düşüb.
"Trisha Kerstin 3" adlı bərənin Sulu əyalətindəki Jolo adasına getdiyi bildirilib.
Sahil Mühafizəsi rəsmiləri yerli mediaya 316 nəfərin xilas edildiyini, axtarış-xilasetmə əməliyyatlarının davam etdiyini bildiriblər.
Basilan adasının qubernatoru Mujiv Hataman "Facebook"da Mindanao adasındakı İzabela limanından çəkildiyi bildirilən şəkilləri paylaşıb. Şəkillərdə sağ qalanların bərələrdən endirildiyi, bəzilərinin termal yorğanlara büküldüyü, digərlərinin isə xərəklərdə aparıldığı göstərilir.
Hataman DZBB radiosuna bildirib ki, sağ qalanların əksəriyyətinin vəziyyəti yaxşıdır, lakin bəzi yaşlı sərnişinlərin təcili tibbi yardıma ehtiyacı var. Xilasetmə işləri davam edərkən, Hataman bildirib ki, səlahiyyətlilər hələ də qeydlərə baxırlar.
7000-dən çox adadan ibarət arxipelaq olan Filippin dəniz təhlükəsizliyi sahəsində zəif göstəricilərə malikdir. Hər il bərə qəzalarında çoxlu sayda insan ölür.