Qətər İsraili atəşkəsi pozmaqda və Qəzzanı yaşayış üçün yararsız hala salmaqda qınayıb

Qəzzada mövcud atəşkəsin əsas vasitəçilərindən biri olan Qətər əmiri İsrailin Qəzzaya son ölümcül hava hücumlarından sonra 11 gün əvvəl qüvvəyə minmiş atəşkəsi pozmaqda ittiham edib.

Bu gün Şura Məclisində çıxış edən Qətər Dövlətinin Əmiri Şeyx Təmim bin Həməd Əl Tani "İsrailin Fələstindəki bütün pozuntularını və tətbiqlərini, xüsusilə də İsrailin Qəzza zolağının insan həyatı üçün yararsız əraziyə çevrilməsini və atəşkəsi pozmağa davam etməsini bir daha şiddətlə qınayırıq" deyib.

Fələstinin müqavimət qrupu HƏMAS daha əvvəl beynəlxalq gücləri oktyabrın 10-da Qəzzada razılaşdırılmış atəşkəsə əməl etməsi üçün İsrailə təzyiq göstərməyə çağırmışdı.

Atəşkəs sazişinin imzalanmasından bəri İsrailin hava hücumları nəticəsində 100-ə yaxın fələstinli ölüb, 200-dən çoxu yaralanıb.

HƏMAS əhəmiyyətli maneələrə və İsrailin dağıntıları intensiv bombalamasına baxmayaraq, israilli girovların cəsədlərinə aid qalıqların qaytarılması üçün cəhd etdiyini açıqlayıb.

HƏMAS bu günə qədər 20 canlı girovu azad edib və təxminən 2000 fələstinli məhbusun müqabilində daha 13 nəfərin cəsədini təhvil verib.

HƏMAS sözçüsü Hazem Qassem İsraili atəşkəsi dəfələrlə pozmaqda və humanitar yardımı məhdudlaşdırmaqla Qəzza xalqına siyasi təzyiq göstərməkdə ittiham edib.

İsrailin 2023-cü ilin oktyabr ayından bu yana davam edən soyqırım hücumları 68.200-dən çox fələstinlinin ölümünə və 170.000-dən çoxunun yaralanmasına səbəb olmaqla, bölgədəki humanitar böhranın ciddiliyini bir daha ortaya qoyur.