BMT 14 milyon insanın aclıq tәhlükәsi ilә üzlәşә bilәcәyi barәdә xәbәrdarlıq edib

Birləşmiş Millətlər Təşkilatının oktyabrın 15-də yaydığı bəyanatda bildirilib ki, donor ölkələrin ciddi büdcə kəsirləri altı ölkədə həyata keçirilən humanitar yardım əməliyyatlarına mənfi təsir göstərib. Bu vəziyyət təxminən 14 milyon insanın aclıq təhlükəsi ilə üzləşməsinə səbəb ola bilər.

BMT-nin ərzaq yardımı sahəsində fəaliyyət göstərən ən böyük qurumu olan ÜƏP yeni hesabatında builki maliyyə vəziyyətinin “heç vaxt olmadığı qədər gərgin olduğunu” vurğulayıb. Agentlik bildirib ki, hazırkı maliyyə çatışmazlığının əsas səbəblərindən biri Tramp administrasiyası dövründə ABŞ və digər Qərb ölkələrinin yardım büdcələrində kəskin azalmalar olub.

ÜƏP xəbərdarlıq edir ki, 13,7 milyon insan maliyyə çatışmazlığı səbəbindən dərhal aclıq təhlükəsi ilə üz-üzə qala bilər. Yardımın azaldığı əsas ölkələr arasında Əfqanıstan, Konqo Demokratik Respublikası, Haiti, Somali, Cənubi Sudan və Sudan yer alır.

Agentliyin icraçı direktoru Cindy McCain bu vəziyyəti belə şərh edib:
"Biz milyonlarla insan üçün həyat qurtaran yardımların gözümüzün önündə yoxa çıxmasını izləyirik. Bu, sadəcə maliyyə çatışmazlığı deyil – bu, edə biləcəyimiz və etməli olduğumuz şeylər arasında yaranan ciddi boşluqdur. Aclıqla mübarizədə onilliklər ərzində əldə etdiyimiz irəliləyişləri itirmək riski ilə üzləşmişik."

Mərkəzi Romada yerləşən ÜƏP-in məlumatına görə, hazırda qlobal səviyyədə aclıq rekord həddə çatıb – 319 milyon insan kəskin ərzaq çatışmazlığı, 44 milyon insan isə kritik aclıq təhlükəsi ilə üzləşir. Təşkilat həmçinin Qəzza və Sudanda acınacaqlı qıtlıq şəraitinin hökm sürdüyünü bildirib.

Əfqanıstan nümunəsində isə ÜƏP qeyd edir ki, ərzaq yardımı, ehtiyacı olan əhalinin cəmi 10 faizindən azına çatdırılır. Bu insanlar növbəti yeməklərinin haradan gələcəyini bilmədən yaşayırlar.

Təşkilat bu il ABŞ-dan 1,5 milyard dollar maliyyə yardımı alacağını gözləyir. Bu, ötən ilki 4,5 milyard dollarlıq büdcə ilə müqayisədə üç dəfədən çox azalma deməkdir. Digər əsas donor ölkələr də maliyyə dəstəklərini kəskin şəkildə azaldıblar.

BMT-nin bir çox digər qurumları – o cümlədən miqrasiya, səhiyyə və qaçqın agentlikləri də ənənəvi donorların dəstəyinin azalması səbəbindən bu il fəaliyyətlərini və işçi heyətini ixtisar etdiklərini açıqlayıblar. Humanitar sektor bütövlükdə ABŞ-ın Beynəlxalq İnkişaf Agentliyində (USAID) aparılan kəskin büdcə ixtisarlarından ciddi şəkildə təsirlənib.