Ermənistanın giriş və çıxışında vurulan sərhəd möhürlərində Ağrı dağının təsviri götürüləcək
Türkiyə Cümhuriyyəti ilə Ermənistan arasındakı sərhəd 1921-ci ildə imzalanan Qars müqaviləsi çərçivəsində 100 ildən çox əvvəl müəyyən edilib
Ermənistan hökumətinin qərarı ilə noyabrın 1-dən etibarən Ağrı dağının təsviri Ermənistanın giriş və ya çıxışındakı sərhəd nişanından (möhürdən) götürüləcək.
Qeyd edək ki, Ağrı dağı Türkiyə ərazisində, Ermənistanla sərhəd yaxınlığında yerləşir.
Ermənistanın əmək və sosial məsələlər naziri Arsen Torosyan "X" sosial media platformasındakı paylaşımında bildirib ki, yenilənmiş möhürlərdə yalnız sərhəd keçidi məlumatları olacaq və əlavə şəkillər yer almayacaq. Torosyan onu da bildirib ki, bu praktika əksər ölkələrin tətbiq etdiyi yanaşmadır.
Ermənistan rəsmiləri qonşu ölkələrə təhlükəli mesajların göndərilməməsi üçün sərhəd-keçid məntəqələrində istifadə olunan pasport möhürlərindən Ağrı dağının təsvirini götürmək qərarına gəldiklərini bəyan ediblər.
Keçmişdəki mübahisələr
2023-cü ildə Fransa sosial mediada fransız rəsmilərindən birinin Ermənistanla bağlı Ağrı dağının şəklinin yer aldığı mübahisəli paylaşımını müdafiə edib. Bu yazı üstüörtülü şəkildə ultramillətçi ermənilərin ərazi iddialarına dəstək kimi qiymətləndirilib.
Həmin vaxt Parisdə Xarici İşlər Nazirliyinin keçirdiyi mətbuat konfransında nazirliyin sözçüsünə Fransanın dağın Ermənistana aid olduğuna inanması, Fransa rəsmilərinin bu mövzuda “səhv məlumat” alması və ya belə bir yazının bir çox Türkiyə vətəndaşını təhqir edəcəyindən xəbərdar olub-olmaması soruşulub.
Xarici İşlər Nazirliyinin sözçüsü Anna-Kler Legendre "Ağrı dağı Ermənistandan baxanda simvolik bir mənzərə təqdim edir" deyib və dağın sərhədə yaxın olduğunu vurğulayıb.
Türkiyənin tənqidi
Türkiyə-Ermənistan Normallaşma Prosesi üzrə xüsusi nümayəndəsi səfir Serdar Kılıç "X" sosial şəbəkəsində etdiyi paylaşımda dağın Türkiyə sərhədləri daxilində olduğunu qeyd edərək deyib:
“Cənab nazir şəkildəki dağ Ağrı dağıdır və Türkiyə sərhədləri içərisindədir və Türkiyənin ayrılmaz bir parçasıdır”.
Kılıç həmçinin əlavə edib: “Buna görə də ya səfəriniz üçün çox qarışıq bir məqsədiniz var, ya da əsas coğrafiya məlumatına çox ehtiyacınız var”.