Suriya Müdafiə naziri Murhef Əbu Kasra oktyabrın 11-də Türkiyə Respublikasının Müdafiə Sənayesi Komitəsinin sədri Haluk Görgün və onu müşayiət edən heyətlə Dəməşqdə görüş keçirib.
Suriya Müdafiə Nazirliyinin “Telegram” kanalında yayımlanan açıqlamaya görə, tərəflər bir sıra ortaq məsələləri nəzərdən keçirib və müdafiə sahəsində əməkdaşlığın inkişaf etdirilməsi yolları müzakirə olunub.
Türkiyə Respublikası Xarici İşlər Nazirliyinin açıqlamasına əsasən, bu görüş 12 oktyabrda Ankarada keçirilməsi planlaşdırılan yüksək səviyyəli toplantı öncəsi baş tutub.
Toplantının gündəliyində təhlükəsizlik əməkdaşlığı və bölgədəki son inkişafların əsas müzakirə mövzusu olacağı gözlənilir. Türkiyəni həmin görüşdə xarici işlər naziri Hakan Fidan, milli müdafiə naziri Yaşar Güler və Milli Kəşfiyyat Təşkilatının rəhbəri İbrahim Kalın təmsil edəcək.
Xatırladaq ki, oktyabrın 8-də Ankarada keçirilən birgə mətbuat konfransında Hakan Fidan Suriyalı həmkarı Əsəd Həsən Şeybani ilə apardıqları müzakirələrdə Suriyadakı son seçkilər, ikitərəfli münasibətlər və regional proseslər barədə “əhatəli və açıq danışıqlar” aparıldığını bildirmişdi.
Nazir H.Fidan həmçinin vurğulamışdı ki, Suriya hökuməti terrorla mübarizə sahəsində iradə nümayiş etdirir. Onun sözlərinə görə, mövcud vəziyyət “Əsəd rejimi dövründə həll olunmayan təhlükəsizlik problemlərini aradan qaldırmaq üçün böyük bir fürsət” yaradır.
