Donald Tramp: ''ABŞ qüvvələri İran və ətrafında hərbi mövcudluğunu davam etdirəcək''

ABŞ Prezidenti Donald Tramp bəyan edib ki, ölkəsi "əsl razılaşma" tam şəkildə qüvvəyə minənə qədər İranda və region ətrafında güclü hərbi mövcudluğunu qoruyub saxlayacaq. Rəsmi "Truth Social" platformasında paylaşım edən Donald Tramp ABŞ-nin bütün hərbi gəmilərinin, təyyarələrinin və şəxsi heyətinin əlavə silah-sursatla birlikdə bölgədə qalacağını vurğulayıb.

Prezident xəbərdarlıq edib ki, əgər razılaşmanın tətbiqi hər hansı səbəbdən baş tutmasa, münaqişələr əvvəlkindən daha şiddətli və dağıdıcı miqyasda olacaq. O, həmçinin "nüvə silahından imtina" barədə razılaşmanın artıq əldə edildiyini bildirərək bunun əksini iddia edən xəbərlərin həqiqəti əks etdirmədiyini qeyd edib.

Xatırladaq ki, aprelin 7-də ABŞ, İsrail və İran arasında iki həftəlik atəşkəs barədə razılıq əldə olunub. Bu müvəqqəti fasilə fevralın 28-də İrana qarşı başladılan və minlərlə itkiyə səbəb olan hərbi əməliyyatları tamamilə dayandıracaq yekun sülh sazişi üçün zəmin hazırlamaq məqsədi daşıyır. Sözügedən atəşkəs qərarı Donald Trampın İrana verdiyi son möhlətin bitməsinə cəmi iki saat qalmış qəbul edilib.