İranın XİN rəhbəri yanvarın 30-da Türkiyəyə səfər edəcək
Türkiyə Xarici İşlər Nazirliyindəki mənbələrin məlumatına görə, İranın xarici işlər naziri Abbas Əraqçi yanvarın 30-da həmkarı Hakan Fidan ilə görüşmək üçün Türkiyəyə səfər edəcək
Türkiyə Xarici İşlər Nazirliyindəki mənbələrin məlumatına görə, İranın xarici işlər naziri Abbas Əraqçi yanvarın 30-da həmkarı Hakan Fidan ilə görüşmək üçün Türkiyəyə səfər edəcək. İki qonşu ölkə təhlükəsizlik, ticarət və regional böhranlar üzrə əməkdaşlığı dərinləşdirməyi hədəfləyir.
Görüşdə nazir Hakan Fidanın rəsmi Ankaranın İrandakı son hadisələri yaxından izlədiyini, İranın sülh və sabitliyinin Türkiyə üçün böyük əhəmiyyət kəsb etdiyini vurğulayacağı gözlənilir. Nazirlikdəki mənbələr bildirir ki, Hakan Fidan Türkiyənin İrana qarşı hər hansı hərbi müdaxiləyə qəti şəkildə qarşı olduğunu bir daha qeyd edəcək və belə bir addımın ciddi regional və qlobal risklər yarada biləcəyi barədə xəbərdarlıq edəcək.
Hakan Fidan həmçinin Ankaranın mövcud gərginliyi dialoq yolu ilə azaltmağa, Tehranın nüvə proqramından qaynaqlanan problemin sürətli və dinc yolla həllinə kömək etməyə hazır olduğunu vurğulayacaq və zərurət yaranarsa, Türkiyənin bu istiqamətdə dəstək göstərə biləcəyini ifadə edəcək.
Hakan Fidanın tarixi əlaqələrə malik olan Türkiyə və İran arasındakı münasibətlərin regional təhlükəsizlik, sabitlik və rifah üçün həyati əhəmiyyət kəsb etdiyini vurğulaması gözlənilir.
Türkiyə xarici işlər naziri həmçinin 2014-cü ildə təsis edilmiş Türkiyə-İran Yüksək Səviyyəli Əməkdaşlıq Şurası kimi mövcud mexanizmlər vasitəsilə əməkdaşlığı daha da gücləndirmək niyyətini ifadə edəcək.
Danışıqlarda əsas diqqət uzun müddətdir gündəmdə olan ikitərəfli ticarət həcminin artırılmasına yönələcək.
Hakan Fidan həmçinin Türkiyənin sərhədyanı ticarət mərkəzləri də daxil olmaqla ticarət, enerji, nəqliyyat və kommunikasiya sahələrində əməkdaşlığın genişləndirilməsində maraqlı olduğunu qeyd edəcək.
Danışıqlarda təhlükəsizlik sahəsində əməkdaşlıq məsələsi diqqət mərkəzində olacaq.Türkiyə xarici işlər nazirinin PKK terror təşkilatının İrandakı qolu olan PJAK-ın son hadisələrdəki roluna diqqət çəkəcəyi və həm İranın, həm də regionun təhlükəsizliyi üçün bu təşkilatın tamamilə və təcili şəkildə zərərsizləşdirilməsinin vacibliyini vurğulayacağı gözlənilir.
Görüşdə həmçinin İran sərhədlərindən kənarda yaranan regional böhranlar da müzakirə olunacaq. Hakan Fidan Türkiyənin Qəzza üzrə sülh planının ikinci mərhələsinə dair təklif olunan mexanizmlərə dəstəyini bir daha ifadə edəcək. O, bölgəyə kifayət qədər humanitar yardımın fasiləsiz çatdırılması da daxil olmaqla, konkret tədbirlərin sürətlə həyata keçirilməsinin vacibliyinə diqqət çəkəcək.
Nazir Hakan Fidan rəsmi Ankaranın Qəzzanın yenidən qurulması prosesinə verəcəyi dəstəyi və fələstinlilərin öz torpaqlarında sülh və təhlükəsizlik şəraitində yaşamalarını təmin edəcək addımları bir daha vurğulayacaq.
Hakan Fidanın regional ölkələri İsrailin hərəkətlərinə qarşı həmrəylik və sıx əməkdaşlıq çərçivəsində birgə hərəkət etməyə çağıracağı gözlənilir.
Hakan Fidan Suriyada sülhün və təhlükəsizliyin təmin olunmasının birbaşa regional sabitliyə xidmət edəcəyini vurğulayacaq. Nazir həmçinin Suriyanın ərazi bütövlüyünü, birliyini və suverenliyini qorumaq üçün atəşkəs rejiminin və tam inteqrasiya sazişinin əhəmiyyətini diqqətə çatdıracaq. O, həmçinin DEAŞ-la mübarizənin zəifləməməsi üçün atəşkəsin qorunub saxlanılmasının vacibliyini xüsusi qeyd edəcək.
Xatırladaq ki, Türkiyə və İran sonuncu dəfə 2024-cü ilin yanvarında Ankarada Prezident Rəcəb Tayyib Ərdoğan və mərhum İran Prezidenti İbrahim Rəisinin həmsədrliyi ilə Yüksək Səviyyəli Əməkdaşlıq Şurasının 8-ci iclasını keçiriblər.
Prezident Ərdoğan İranın hazırkı Prezidenti Məsud Pezeşkian ilə sonuncu dəfə 2025-ci ilin sentyabrında Çində baş tutan Şanxay Əməkdaşlıq Təşkilatının (ŞƏT) sammiti çərçivəsində görüşüb.