Türkiyə Respublikasının Prezidenti Rəcəb Tayyib Ərdoğan ilə ABŞ prezidenti Donald Tramp arasında ikitərəfli münasibətlərin, eləcə də regional və qlobal məsələlərin müzakirəsi məqsədilə telefon danışığı aparılıb. Görüşlə bağlı açıqlama Türkiyə Respublikası Prezident Administrasiyasının İctimaiyyətlə Əlaqələr İdarəsi tərəfindən verilib.
Prezident R.T.Ərdoğan D.Trampa Türkiyənin Suriyadakı prosesləri yaxından izlədiyini, Suriyanın birliyi, həmrəyliyi və ərazi bütövlüyünün rəsmi Ankara üçün vacib olduğunu ifadə edib.
Tərəflər həmçinin DEAŞ terror təşkilatı ilə mübarizə və Suriyadakı həbsxanalarda saxlanılan DEAŞ üzvlərinin vəziyyəti ilə bağlı fikir mübadiləsi aparıblar.
Dövlət başçısı R.T.Ərdoğan bir daha vurğulayıb ki, terrordan təmizlənmiş, bütün sahələrdə inkişaf edən, dinc bir Suriya regional sabitliyə töhfə verəcək.
Qəzzada sülh üçün ABŞ ilə koordinasiya
Qəzza məsələsinə də toxunan Prezident R.T.Ərdoğan bölgədə sülhün təmin olunması istiqamətində səylərin davam etdiyini bildirərək, Türkiyənin bu mövzuda ABŞ ilə koordinasiyalı şəkildə fəaliyyət göstərməyə davam edəcəyini qeyd edib.
Ölkə rəhbəri R.T.Ərdoğan eyni zamanda D.Trampa Qəzza Sülh Şurasına etdiyi dəvətə görə təşəkkürünü çatdırıb.
Qeyd edək ki, D.Tramp yanvarın 20-də verdiyi açıqlamada “çox sevdiyim” R.T.Ərdoğan ilə çox vacib bir telefon danışığı aparacağını demişdi.
Xatırladaq ki, Ağ Ev yanvarın 16-da yaydığı bəyanatda bildirib ki, D.Trampın Qəzzada İsrailin soyqırımını daimi şəkildə dayandırmağı və bölgənin yenidən qurulmasını hədəfləyən 20 maddəlik planının icrasında həlledici rol oynayacaq Qəzza Sülh Şurası yaradılıb. Şuranın strateji nəzarəti təmin etməsi, beynəlxalq resursları səfərbər etməsi və Qəzzanın münaqişə mərhələsindən sülh və inkişaf prosesinə keçidində hesabatlılığı təmin etməsi nəzərdə tutulur.
ABŞ həmçinin D.Trampın Qəzza münaqişəsinə son qoymağa yönəlmiş hərtərəfli planının ikinci mərhələsini həyata keçirmək məqsədilə Qəzza İdarəetməsi üzrə Milli Komitəni, Təsisçi İcra Şurasını və keçid çərçivəsini dəstəkləmək üçün Qəzza İcra Şurasını formalaşdırıb.
D.Tramp aralarında Türkiyə Respublikasının Prezidenti Rəcəb Tayyib Ərdoğanın da olduğu bir sıra dövlət və hökumət başçılarını bu şuraya qatılmağa dəvət edib.
