Azərbaycan təbii qazını Türkiyəyə və Avropaya daşıyan Trans-Anadolu Təbii Qaz Boru Kəməri (TANAP) 2018-ci ildən bu yana Türkiyəyə 39,2 milyard, ümumilikdə isə 99 milyard kubmetrə yaxın təbii qaz ötürüb.
Türkiyə Respublikasının energetika və təbii sərvətlər naziri Alparslan Bayraktar "NSosyal" sosial şəbəkə hesabındakı paylaşımında Türkiyə və Azərbaycan əməkdaşlığının regionun sabitliyinə və gələcəyinə güc qatmağa davam edəcəyini bildirib.
TANAP-ın enerji təchizatı təhlükəsizliyinin ən böyük təminatı olduğunu vurğulayan A.Bayraktar deyib: "Türkiyə və Azərbaycan qardaşlığının rəmzi, Cənub Qaz Dəhlizinin onurğa sütunu olan TANAP-ın 8 yaşı tamam olur. 2018-ci ildən bu günədək ölkəmizə 39,3 milyard, ümumilikdə isə 99 milyard kubmetrə yaxın təbii qaz nəql edən bu nəhəng layihə təkcə ölkəmizin deyil, həm də Avropanın enerji təchizatı təhlükəsizliyinin ən böyük təminatıdır. İki dövlət, tək millət şüarı ilə çiyin-çiyinə həyata keçirdiyimiz bu əməkdaşlıq regionumuzun sabitliyinə və ortaq gələcəyimizə güc qatmağa davam edəcək."
