Avstraliya Baş naziri Entoni Albanese bildirib ki, iqlim dəyişikliyi naziri Kris Bouen Avstraliya adından COP prezidenti kimi danışıqlar aparacaq, Türkiyə isə konfransa ev sahibliyi edəcək və COP sədrliyini öz üzərinə götürəcək.
İqlim üzrə mütəxəssis Halil Hasar T24-ə açıqlamasında bildirib ki, Türkiyənin COP31-ə ev sahibliyi etməyə hazırlaşması, onun sülh diplomatiyasındakı fəal rolunu iqlim sahəsinə də daşımaq istədiyini göstərir.
H.Hasar bildirib ki, Türkiyə BMT-nin iqlim konfranslarında vacib sayılan inklüziv dialoq mühitinə uyğun şəkildə, istənilən tərəflə danışa bilən bir ölkə kimi seçilir.
H.Hasar deyib: “COP qərarları razılaşma yolu ilə qəbul edilir. Ev sahibi ölkə Aİ, Rusiya, Körfəz, Afrika, Braziliya, Yaxın Şərq və hətta Sakit Okean ölkələri də daxil olmaqla bütün tərəflərlə sərbəst danışıqlar apara bilməlidir. Türkiyə isə bütün tərəfləri anlamaq və təmsil etmək baxımından yaxşı mövqedədir”.
Türkiyə Respublikasının ətraf mühit, şəhərsalma və iqlim dəyişikliyi nazirinin müavini Fatma Varank bildirib ki, Türkiyə iqlim məsələlərinə empatiya və ortaq məsuliyyət hissi ilə yanaşır.
Varank deyib: “İqlim böhranı yalnız müəyyən bölgələrə deyil, bütün dünyaya təsir edən ortaq bir problemdir və həll yolu yalnız həmrəylik, əməkdaşlıq və qarşılıqlı anlaşma ilə əldə edilə bilər”.
O, qeyd edib ki, Türkiyə qlobal iqlim gündəliyinə konstruktiv töhfələr verməyə və bütün ölkələrin narahatlıqlarını nəzərə alan inklüziv yanaşmanı qorumağa sadiqdir.
Varankın sözlərinə görə, iqlim tədbirlərini ön planda saxlayan Türkiyə COP31-in yalnız müəyyən bölgələrə deyil, iqlim böhranından ən çox təsirlənən Sakit Okean regionu da daxil olmaqla bütün həssas bölgələrə diqqət yetirməsini vacib hesab edir.
“Sakit Okean Avstraliyanın gündəmdə saxlamaq istədiyi kövrək bir bölgə idi. Onlar dünyanın diqqətini bu bölgəyə cəlb etmək istəyirdilər və biz bunu ürəkdən dəstəklədik. Türkiyə həmişə həssas xalqların yanında olub’’,-deyə Fatma Varank vurğulayıb.
Varank həmçinin bildirib ki, Türkiyə ev sahibliyini öz üzərinə götürərsə inkişaf etmiş və inkişaf etməkdə olan ölkələr arasında körpü rolunu oynaya bilər.
Türkiyənin birinci xanımı Əminə Ərdoğanın davamlılıq və iqlim dəyişikliyi sahəsində həyata keçirdiyi layihələr isə ölkənin inklüziv iqlim liderliyinə dair geniş öhdəliyini daha da gücləndirir.
2017-ci ildə Əminə Ərdoğanın rəhbərliyi ilə həyata keçirilən “Sıfır tullantı” layihəsi Türkiyənin ətraf mühit siyasətinin formalaşmasında mühüm rol oynayıb.
Bu təşəbbüs dövlət qurumlarında, bələdiyyələrdə və özəl sektorda tullantıların azaldılması, təkrar emalın artırılması və dairəvi iqtisadiyyat təcrübələrinin inkişafını təşviq edərək Türkiyəni resurslardan səmərəli istifadə edən ölkələr arasında qlobal liderlərdən birinə çevirib.
Əminə Ərdoğan həmçinin beynəlxalq standartların inkişafı və sıfır tullantı təcrübələrinin dünyada təşviqi məqsədilə qlobal mütəxəssisləri bir araya gətirən BMT-nin Sıfır Tullantı üzrə Yüksək Səviyyəli Məsləhət Şurasına sədrlik edib.
İqlim tədbirlərini nəsillərarası ədalət məsələsi kimi qiymətləndirən Ərdoğan ətraf mühitin qorunmasının gələcək nəsillər qarşısında bir məsuliyyət olduğunu vurğulayır.
