İtaliya-İsrail oyunu öncəsi tərəfdarlar arasında toqquşma yaşandı

İtaliyanın 3:0 hesablı qələbəsi ilə başa çatan Dünya Çempionatı seçmə mərhələ oyunundan öncə Udine şəhərində minlərlə insan FIFA-dan İsrailin beynəlxalq futboldan kənarlaşdırılmasını tələb edərək etiraz yürüşü keçirib. Oyun ərəfəsində Fələstin tərəfdarı bir qrup nümayişçi ilə polis arasında qarşıdurmalar yaşanıb.

İtaliyanın şimal-şərqində yerləşən Udine şəhərində keçirilən etiraz aksiyasında, Qəzzada imzalanan atəşkəs razılaşmasına və İsraillə “Həmas” arasında həyata keçirilən əsir-mübadilə razılaşmasına baxmayaraq, təxminən 10 min nəfər yer alıb.

Aksiya sırasında polis qüvvələri bir qrupa qarşı su şırnaqlarından və gözyaşardıcı qazdan istifadə edib. Əraziyə 1.000-dən çox polis və əsgər cəlb edilib, helikopterlər və pilotsuz uçuş aparatları ilə vəziyyət təqib altında saxlanılıb. Etirazçılar İtaliyanın İsraili 3:0 hesabı ilə məğlub etdiyi “I” qrup oyununun keçirildiyi “Bluenergy” stadionundan bir neçə kilometr uzaqda dayandırılaraq ilərləmələrinə imkan verilməyib.

Oyundan sonra İtaliya millisinin baş məşqçisi Cennaro Qattuzo jurnalistlərə açıqlama verərək deyib: “Bunu gizlətməyin mənası yoxdur. Bu gün nə bizim, nə də sizin üçün asan oldu. Buraya, bayram ab-havası olmayacağını bilərək gəldik.”

İsrailin futboldan kənarlaşdırılması tələbləri

Oyundan qabaq stadionda insidentlərin qarşısını almaq üçün polis nəzarət məntəqələri, beton baryerlər və metal detektorlar qurulub.

Stadion daxilində 10 minlik azarkeşin bir qismi İsrail himnini fitə basıb. Yürüş zamanı isə “Fələstin azad olsun” şüarları və “İsrailə qırmızı kart göstərin” yazılı plakatlarla dinc şəkildə başlayıb, lakin toqquşma ilə nəticələnib.

Qeyd edək ki, etirazçılar FIFA-dan 2022-ci ildə Ukrayna müharibəsinin başlanmasından sonra Rusiyaya tətbiq edilən sanksiyalara bənzər şəkildə, İsrailin də beynəlxalq turnirlərdən uzaqlaşdırılmasını tələb edirlər.