M.Salah Misir milli komandasını Afrika Millətlər Kubokunun dörddəbir finalına çıxardı

“Liverpool”un misirli əfsanəvi hücumçusu Məhəmməd Salah Misirin Benin milli futbol komandasını 3:1 hesabı ilə məğlub edərək Afrika Millətlər Kubokunun dörddəbir finalına yüksəlməsində həlledici rol oynayıb. Lakin o, oyundan sonra “Firounlar” ləqəbi ilə tanınan Misir milli futbol komandasının turnirin qalibi olmaq üçün favoritlər sırasında yer almadığını deyib.

M.Salah əlavə vaxtın son dəqiqələrində üçüncü və həlledici qolu vuraraq, Beninin 83-cü dəqiqədə hesabı bərabərləşdirməsindən sonra əlavə vaxta gedən qarşılaşmada Misirin qələbəsini rəsmiləşdirib.

Matçdan sonra o, komandasının Afrika Millətlər Kubokunun qalibi olmaq üçün favoritlər sırasında olmadığını, lakin Mərakeşdə keçirilən turnirdə daha irəli getmək üçün əllərindən gələni edəcəklərini bildirib.

Hossam Hassanın rəhbərlik etdiyi komanda 2010-cu ildən bəri ilk dəfə və ümumilikdə səkkizinci dəfə çempionluğu qazanmağı hədəfləyir.

M.Salah jurnalistlərə açıqlamasında deyib: “Çempionluğu qazanmaq üçün favorit komanda olduğumuzu düşünmürəm. Gənc oyunçularımız var və onların əksəriyyəti Misirdə çıxış edir. Biz sadəcə ölkəmiz üçün mübarizə aparırıq. Amma hər kəs əlindən gələni edir və bunu bu gün də gördünüz. Afrika Millətlər Kubokunda asan oyun yoxdur. Komandaların səviyyələri bir-birinə çox yaxındır. Dünən komandaya dedim ki, heç bir komanda dörd və ya beş top fərqi ilə uduzmur. (Benin) yaxşı komandaya və yaxşı baş məşqçiyə malikdir. Sonda qalib gəldiyimiz üçün sevincliyəm.”

Qeyd edək ki, M.Salah Afrika Millətlər Kubokunda keçirdiyi 22 oyunda 10 qol vurub. Bu göstərici turnirin bütün dövrlər üzrə ən məhsuldar futbolçusu Hassan əl-Şazlinin nəticəsindən iki qol, hazırkı baş məşqçi Hossam Hassanın vurduğu qollardan isə bir qol azdır.

Misir yanvarın 9-da Mərakeşin Aqdir şəhərində keçiriləcək dörddəbir final görüşündə son çempion Fil Dişi Sahili milli futbol komandası və ya Burkina Faso milli futbol komandası ilə üz-üzə gələcək.

Nigeriya millisi dörddəbir finala yüksəldi

“Super Qartallar” ləqəbi ilə tanınan Nigeriya milli futbol komandası Mozambik milli futbol komandasını 4:0 hesabı ilə məğlub edərək dörddəbir finala vəsiqə qazanıb. Bu nəticə Nigeriyanın rəqiblərinə kubok uğrunda mübarizəyə tam hazır olduğu mesajını verib.

“Galatasaray”ın futbolçusu Viktor Osimhen Nigeriya adına iki qol vurub. Ademola Lookman 20-ci dəqiqədə hesabı açıb, Akor Adams isə 75-ci dəqiqədə son qolu qeydə alıb.

Nigeriya komandası turnirdə keçirdiyi dörd oyunun hamısında qələbə qazanıb, 12 qol vurub və 4 qol buraxıb.