Portuqaliyada prezident seçkiləri keçirilib
Keçirilən prezident seçkilərində ikinci tura gediləcəyi təxmin edilir
Portuqaliyada yanvarın 18-də prezident seçkiləri keçirilib. Seçicilər ifrat sağa dəstəyin artdığı və sorğuların ikinci tur ehtimalına işarə etdiyi bir şəraitdə səsvermə məntəqələrinə üz tutublar.
2021-ci ildə səslərin təxminən 60 faizini toplayan mövcud mühafizəkar prezident Marselo Rebelo de Souza ikinci və son beşillik səlahiyyət müddətini başa vurduğundan, onun yerinə keçmək üçün 11 namizəd mübarizə aparır. Namizədlər arasında son prezident seçkilərində təxminən 12 faiz səs toplamış ifrat sağçı “Şeqa” Partiyasının lideri Andre Ventura da yer alır.
Digər diqqət çəkən namizədlər sırasında hakim mərkəz-sağ Sosial Demokrat Partiyasından (PSD) Luia Markeş Mendiş, müxalif Sosialist Partiyasından Antonio Joze Sequru, Liberal Təşəbbüs Partiyasından Joao Kotrim di Fiqeyredu və müstəqil namizəd Enrike Quveya Melu var.
RTP xəbər agentliyinin ötən həftə yayımladığı sorğuya əsasən, A.Ventura və A.J.Sequrunun önə çıxması fonunda fevralın 8-nə planlaşdırılan ikinci tur seçkilər demək olar ki, qaçılmaz görünür.
Sorğunun nəticələri A.Venturanın səslərin təxminən 24 faizi ilə lider olduğunu, onu 23 faizlə A.J.Sequrunun yaxından izlədiyini, J.K.Fiqeyredunun isə 19 faizlə geri qaldığını göstərir.
Portuqaliya prezident seçkilərində indiyədək yalnız bir dəfə – 1986-cı ildə ikinci tura gedib. Həmin vaxt keçmiş sosialist baş nazir Mario Soarez ilk turdakı məğlubiyyətini aradan qaldıraraq Freytaş du Amaralı məğlub etmişdi.
Qeyd edək ki, seçki kampaniyası sosial bərabərsizlik, aşağı əməkhaqları, mənzil çatışmazlığı, miqrantların hüquqlarına tətbiq edilən məhdudiyyətlər və Baş nazir Luis Monteneqronun rəhbərlik etdiyi mühafizəkar hökumətin həyata keçirdiyi əmək siyasətləri ətrafında aparılan müzakirələrin kölgəsində keçib.
Yeddi il əvvəl yaradılan və Andre Venturanın rəhbərlik etdiyi “Şeqa” partiyası ötən may ayında keçirilən növbədənkənar parlament seçkilərindən sonra ilk dəfə əsas müxalifət partiyası mövqeyinə yüksəlib.
Analitiklər A.Venturanın birinci turu öndə başa vurmasının mümkün olduğunu, lakin ikinci turda mütləq çoxluğu təmin etməsinin çətin olacağını bildirirlər. Seçkilərdə, o cümlədən xaricdə yaşayan təxminən 1,6 milyon seçici də daxil olmaqla, ümumilikdə 11 milyona yaxın vətəndaşın səs verməsi gözlənilir.