İsrail Qəzzanın müxtəlif bölgələrini hədəf almağa davam edir

Oktyabrın 10-da qüvvəyə minən atəşkəs razılaşmasına baxmayaraq İsrail ordusunun dekabrın 17-də Qəzzada bir neçə ərazini atəşə tutduğu bildirilib.

Şahidlərin sözlərinə görə, İsrail qüvvələri Xan Yunisin cənub-şərqini, həmçinin Qəzzanın cənubunda yerləşən Rəfah şəhərinin şimalındakı Moraq dəhlizinin ətrafını hədəf alıb.

Qəzzanın mərkəzində isə İsrail hərbi maşınları və buldozerləri şimal-şərq istiqamətindən Deyr əl-Bələhə daxil olaraq qazıntı işləri aparıblar.

Bundan əlavə, İsrail Qəzzadakı Cəbəliya qaçqın düşərgəsinin şərq hissələrini də atəşə tutub.

Mümkün itkilər barədə hələlik rəsmi məlumat verilməyib.

Qəzza Səhiyyə Nazirliyinin məlumatına görə, atəşkəsdən bəri İsrailin hücumları nəticəsində azı 393 nəfər həlak olub, 1 074 nəfər isə yaralanıb.

Nazirlik bildirir ki, 2023-cü ilin oktyabrından bu yana İsrailin hücumları nəticəsində əksəriyyəti qadın və uşaq olmaqla, təxminən 70 700 nəfər ölüb, 171 000-dən çox insan yaralanıb.