İsrail ordusunda istefa müraciətləri artıb

İsrail media orqanlarının məlumatına görə, srail ordusu zabit və əsgərlərin xidmətdən çıxmaq üçün müraciətlərinin artması səbəbindən "kütləvi tərxis" barədə xəbərdarlıq edib.

"Yedioth Ahronoth" qəzetinin yazdığına görə, yüzlərlə zabit və gizir daimi xidmətdən çıxmaq üçün müraciət etdikdən sonra ordu bu vəziyyətin ciddi nəticələr doğura biləcəyini bildirib. İndiyə qədər nizami qüvvələrdə xidmət edən 500 zabit və gizir vəzifəsindən tərxis olunmaq üçün müraciət edib.

Hərbi rəsmilər bütün yaş qrupları və rütbələr üzrə istefa müraciətlərinin davamlı artdığını vurğulayaraq vəziyyəti kritik nöqtəyə çatmış "kadr böhranı" kimi qiymətləndiriblər. Qəzetin məlumatına görə, ordu daimi nizami heyətdən tərxis olunmaq üçün müraciətlərin daha da artacağını gözləyir.

Hesabatda həmçinin qeyd olunub ki, Knesset hələ də zabit və əsgərlər üçün təqaüd müavinətlərini 7–11 faiz artıracaq qanunvericilik dəyişikliklərini təsdiqləməyib və bu gecikmə artan narazılığa səbəb olub.

Qəzet bildirir ki, istefalar əsasən nizami xidmətdə olan daimi heyətdən gəlir və bu, xüsusilə Qəzzadakı əməliyyatlar zamanı aşağı maaşlar, personal itkisi və artan iş yükü ilə bağlıdır.

Ordu minlərlə zabiti və giziri tam xidmətdə saxlamaqda çətinlik çəkir ki, bu da ordunun ümumi gücünün azalmasına səbəb ola bilər.