Türkiyə Xarici İşlər Nazirliyi beynəlxalq sularda İsrail qüvvələri tərəfindən saxlanılan 36 Türkiyə vətəndaşının oktyabrın 4-də (bu gün) xüsusi reyslə Türkiyəyə gətiriləcəyini bildirib. Nazirliyin sözçüsü sosial şəbəkə “X” üzərindən verdiyi açıqlamada deyib: “Dəqiq say hələlik müəyyənləşməyib. Qalan vətəndaşlarımızın da ən qısa zamanda Türkiyəyə dönə bilmələri üçün zəruri prosedurların tamamlanması istiqamətində işlər davam etdirilir.”

Həmçinin planlaşdırılan uçuşda üçüncü ölkə vətəndaşlarının da olacağı qeyd edilib.

Xatırladaq ki, İsrail qüvvələri oktyabrın 2-də Qlobal Sümud Donanmasına hücum edərək gəmiləri ələ keçirib və 50-dən çox ölkədən olan 470-dən artıq aktivisti saxlayıb. Donanmanın əsas məqsədi Qəzzaya humanitar yardım çatdırmaq və İsrailin tətbiq etdiyi blokadanı yarmaq idi.

470-dən artıq fəal saxlanılıb

Qeyd edək ki, beynəlxalq qeyri-hökumət təşkilatlarından ibarət Azadlıq Donanması Koalisiyası (FFC) 2010-cu ildən bəri Qəzza blokadasını qırmaq və bölgədəki humanitar böhrana diqqət çəkmək üçün müxtəlif təşəbbüslər həyata keçirir. İsrail isə təxminən 18 ildir 2,4 milyon insanın yaşadığı Qəzzanı blokada altında saxlayır.

Eyni zamanda, 2023-cü ilin oktyabrından bəri İsrailin intensiv bombardmanları nəticəsində, çoxu qadın və uşaq olmaqla, təqribən 66 min fələstinli qətlə yetirilib. Davam edən soyqırım Qəzzanı yaşanmaz vəziyyətə salıb, blokada isə bölgəni aclıq və qıtlığa məhkum edib.